Fjárfestir skoðar að setja 1,2 milljarða í Hörpuhótelið

Eigendur Auro Investments eiga í viðræðum við bandarískan fjárfesti um 1,2 milljarða króna fjármögnun á lúxushótelinu sem félagið vill reisa við Hörpu.

Samkvæmt heimildum Fréttablaðsins eru viðræðurnar á lokastigi en þær hafa staðið yfir síðan í vor. Ekki hafa fengist upplýsingar um hver fjárfestirinn er. Hann er þó sagður hafa komið að byggingu hótela í Bandaríkjunum en aldrei að fjárfestingarverkefnum hér á landi.

Forsvarsmenn Auro eiga einnig í viðræðum við aðra erlenda fjárfesta um fjármögnun hótelsins. Bala Kamallakharan, einn eigenda Auro Investments ehf., segir ekki tímabært að upplýsa um hverjir sýni verkefninu áhuga.

„Við erum enn í þessum viðræðum og því getum við ekki gefið neitt upp ennþá. Verkefnið er hins vegar að þokast áfram og það er ákveðinn aðili mjög áhugasamur um það. En engar ákvarðanir hafa verið teknar,“ segir Kamallakharan.

Auro Investments er í eigu indverskra fjárfesta frá Auro Investment Partners LLC, Mannvits og Teiknistofunnar Arkitektar, T.ark. Eigendur félagsins ætluðu upphaflega að hefja framkvæmdir á þessu ári. Ásgeir Ásgeirsson, arkitekt hjá T.ark, segir enn unnið að hönnun hótelsins og að sú vinna sé í fullum gangi.

„Það er verið að vinna í verkefninu á fullu og tímaplön um að opna það árið 2017 hafa ekkert breyst,“ segir Ásgeir.

Áform Auro hljóða nú upp á 15.100 fermetra fimm stjörnu hótel með 250 herbergjum. Einnig verða þar 25 svítur sem verða 45 fermetrar að stærð og ein forsetasvíta sem verður 150 fermetrar. Að auki er gert ráð fyrir um eitt hundrað íbúðum á lóðinni, tæplega þrjú þúsund fermetra verslunar- og þjónusturými og bílakjallara með 130 stæðum.

Heildarkostnaður verkefnisins nemur um 14 milljörðum króna. Auro tryggði sér lóðina á síðasta ári þegar félagið greiddi 1.825 milljónir fyrir hana.

Ekki liggur enn fyrir hvaða nafn hótelið mun bera en fjölmiðlar greindu frá því í vetur að hótelkeðjurnar W Hotels og Marriott hefðu áhuga á að koma inn í verkefnið sem samstarfsaðilar. Að sögn Ásgeirs er ekki búist við að nafn hótelsins verði tilkynnt áður en fjármögnun hótelsins liggur fyrir.