Vilja efla viðskipti og tengsl á Bransadögum

„Við erum að þessu til að efla tengsl og viðskipti milli íslenskrar kvikmyndagerðar og umheimsins,“ segir Hrönn Marínósdóttir, stjórnandi RIFF, um Bransadaga kvikmyndahátíðarinnar sem haldnir verða í byrjun október.

Erlendu framleiðslufyrirtækin Trust Nordisk, Films Boutique, Film Republic og Pascale Ramonda eru á meðal þeirra sem hafa boðað komu sína á dagana. Síðastnefnda fyrirtækið keypti nýverið sýningarréttinn á kvikmyndinni París norðursins í Evrópu.

„Það koma hátt í tvö hundruð manns hingað á Bransadagana. Í þeim hópi eru erlendir blaðamenn, leikstjórar, framleiðendur, sölu- og dreifingaraðilar og stjórnendur kvikmyndahátíða,“ segir Hrönn.

Hún segir blaðamennina koma frá fjölmiðlum á borð við Hollywood Reporter, Variety og Huffington Post.

„Í fyrra kom Hollywood Reporter einnig og gerði viðamikla úttekt. Að fá umfjöllun í stórum erlendum blöðum er auðvitað mikilvægt og þessir gestir munu meðal annars heimsækja Reykjavík Studios og skoða það nýja framleiðslufyrirtæki.“

Spurð hvort Bransadagarnir hafi áður leitt til samninga á milli innlends kvikmyndagerðarfólks og erlendra fyrirtækja nefnir Hrönn dæmi frá árinu 2008.

„Þá kom rússneski leikstjórinn Alexander Sokurov á hátíðina og gerði í kjölfarið samning við Sagafilm. Hann endaði á að taka upp kvikmynd hér á landi og borgaði Sagafilm 70 milljónir króna,“ segir Hrönn. Hún bætir við að í ár sé áhersla lögð á að kynna þá þjónustu sem er í boði hjá íslenskum fyrirtækjum sem koma að kvikmyndaframleiðslu.

„Íslensk kvikmyndagerð nýtur mikillar virðingar og er mjög vinsæl víða um heim eins og sést á erlendum kvikmyndahátíðum og margar íslenskar myndir hafa verið að gera góða sölu- og dreifingarsamninga við stór fyrirtæki úti í heimi.“