Seinni eiginmaðurinn tók sitt eigið líf

Grínistinn Joan Rivers lést á fimmtudagskvöld 81 árs að aldri. Hún hætti að anda í miðri hálsskurðaðgerð í síðustu viku og hafði legið eftir það þungt haldin á Mt. Sinai spítalanum í New York.

Spéfuglinn Joan Alexandra Molinsky fæddist þann 8. júní árið 1933 í Brooklyn New York. Hún var yngsta dóttir rússneskra gyðinga sem voru innflytjendur í Bandaríkjunum. Hana dreymdi ung um að losna úr fátæktinni í Brooklyn og sat oft fyrir utan leikhúsin og beið þess að vera uppgötvuð. Seinna lærði hún ensku og mannfræði í Barnard-háskóla.

„Ef ég væri ekki í skemmtanabransanum væri ég klárlega mannfræðingur. Mannfræði var aukafag mitt í háskóla. En ég þyrfti að taka hárgreiðslumann og förðunarfræðing með mér í fornleifauppgröftinn,“ grínaðist hún með í viðtali við Us Weekly fyrir nokkrum árum.

Joan skaust upp á stjörnuhimininn á sjöunda áratug síðustu aldar þegar hún birtist í ýmsum skemmtiþáttum, þar á meðal The Tonight Show, The Ed Sullivan Show og The Carol Burnett Show. Hún fór á kostum með Johnny Carson í The Tonight Show sem varð til þess að hún fékk sinn eigin þátt sem hét einfaldlega That Show with Joan Rivers. Sá þáttur leið undir lok árið 1969 en hún hélt áfram að vera gestur hinna ýmsa þátta sem og að vinna bak við tjöldin. Árið 1978 skrifaði hún og leikstýrði myndinni Rabbit Test með Billy Crystal og Doris Roberts í aðalhlutverki.

Stærsta tækifæri Joan kom árið 1983 þegar hún var gerð að meðstjórnanda The Tonight Show með Johnny Carson og var hún fyrsti kvenstjórnandi spjallþáttar í sjónvarpssögu Bandaríkjanna. Upp úr slitnaði hjá Joan og Johnny og Joan fékk sinn eigin þátt á Fox, The Late Show Starring Joan Rivers árið 1986. Ári síðar var sá þáttur tekinn af dagskrá og árið 1989 stjórnaði hún The Joan Rivers Show. Fyrir hann fékk hún Daytime Emmy-verðlaun og stjörnu á frægðargötunni í Hollywood.

Á tíunda áratug síðustu aldar var hún hvað þekktust fyrir að vera fréttakona á rauða dreglinum fyrir sjónvarpsstöðina E! og notaði einkunnarorð sín Can we talk? til að ná athygli stjarnanna og spyrja þær í hverju þau voru. Það má segja að það hafi verið undanfari þáttarins Fashion Police á E! sem hófu göngu sína árið 2010 en þar talaði Joan hispurslaust um fatnað stjarnanna og móðgaði marga. Þá má ekki gleyma veru hennar í þætti Donalds Trump, Celebrity Apprentice, árið 2009 þar sem hún fór með sigur af hólmi.

Joan kom líka víða við í leiklistinni og fékk meðal annars tilnefningu til Tony-verðlaunanna fyrir hlutverk sitt í Sally Marr árið 1994. Þá gaf hún einnig út grínplötur og bækur.

Mikið gekk á í einkalífi Joan. Hún var tvígift, fyrst James Sanger og síðar Edgar Rosenberg. Hjónaband hennar og James var ógilt stuttu eftir brúðkaupið en hún var gift Edgari frá árinu 1965 og þangað til hann framdi sjálfsmorð árið 1987. Þau eignuðust eina dóttur, Melissa Rivers, sem kom í heiminn 20. janúar árið 1968. Þær mæðgur voru mjög nánar og setti Joan hana ávallt í fyrsta sæti og einnig son hennar, Cooper, sem fæddist árið 2000.

Melissa sendi frá sér hjartnæma tilkynningu á fimmtudagskvöldið eftir að móðir hennar kvaddi þennan heim.

„Stærsta gleði móður minnar í lífinu var að láta fólk hlæja. Ég veit að hennar hinsta ósk væri að við myndum hlæja bráðum þó það sé mjög erfitt núna.“