Bráðfyndinn líffræðingur og flippaður listamaður

Lífið mælir með nokkrum skemmtilegum og fræðandi síðum á samfélagsmiðlunum sem vert er að kíkja á.

Instagram

robpruitt5000

Post-popplistamaðurinn Rob Pruitt er óhræddur við að setja verk inn á Instagram sem eru ansi frábrugðin því sem gerist og gengur. Hann er afar vinsæll á síðunni og fylgjast tæplega þrjú þúsund manns með honum. Hann býður meðal annars upp á listaverkaröð sem heitir Partídýr þar sem dýrabangsar sjást svífa um með ský í bakgrunni. Flippað og frekar töff á skringilegan hátt.

Twitter

Joanne Manaster

Twitter-síða líffræðingsins Joanne Manaster hefur náð á ýmsa lista yfir Twitter-síður sem geta gert þig aðeins klárari. Hún tístir um alls kyns fróðleik og gerir hann skemmtilegan og afar aðgengilegan fyrir þá sem vita ekki mikið um líffræði. Stundum birtir hún líka myndbönd sem eru ekki síður fræðandi og fyndin.

Facebook

Who What Wear

Hér er hægt að finna allt og ekkert um tísku. Farið er ofan í saumana á því í hverju stjörnurnar eru, hvort sem það er á rauða dreglinum eða á heilsubótargöngu, og boðið upp á ráð um hvernig megi nota hitt og þetta sem fyrirfinnst í fataskápnum. Ekki er einblínt á hátísku heldur einnig tísku á viðráðanlegu verði fyrir hinn almenna borgara.