Vilja Listaháskólann í miðbæinn

Borgarráð beitir sér fyrir því að Listaháskóli Íslands rísi á svokölluðum Stjórnarráðsreit við Sölvhólsgötu. Nú er gert ráð fyrir byggingu þriggja ráðuneyta á reitnum.

Í bréfi borgarráðs til forsætisráðherra er honum tilkynnt um endurskoðun á deiliskipulagi svæðisins og óskað er eftir afstöðu forsætisráðuneytisins til þess möguleika að Listaháskólinn rísi á reitnum. „Reykjavíkurborg vill vinna þétt með Listaháskólanum að því að leysa úr húsnæðisvanda hans. Það er ástæðan fyrir þessu öllu saman,“ segir Dagur B. Eggertsson, formaður borgarráðs. „Það væri frábært fyrir Listaháskólann að vera þarna og það væri flott fyrir þetta svæði að fá skólann,“ segir Dagur.

Starfsemi Listaháskólans er nú dreifð um borgina. Upphaflega sóttist skólinn eftir lóð við Laugaveg, en það skipulag fékkst ekki samþykkt. Síðan þá hafa húsnæðismál skólans verið í biðstöðu. 

„Þetta er okkar leið til þess að ýta við málinu. Stjórnarráðið efndi til hönnunarsamkeppni um reitinn árið 2002 og við viljum kalla fram svör um hvað eigi gera,“ segir Dagur. Hann segir nauðsynlegt að taka af skarið, bæði varðandi staðsetningu Listaháskólans og skipulag Stjórnarráðsreitsins.

Heimilt er að rífa þrjú steinhús, það er hús Hæstaréttar við Lindargötu 3 sem nú hýsir meðal annars fjármálaráðuneytið. Hús Jóns Þorsteinssonar við Lindargötu 7, sem var friðað árið 2011, og hús við Sölvhólsgötu 13 sem nú hýsir hluta af starfsemi Listaháskólans. Fjórða húsið, hús Landsímans við Sölvhólsgötu 11 var rifið árið 2002 í kjölfar samkeppni um nýbyggingu þriggja ráðuneyta.

Ljóst er að ef steinhúsin þrjú fá að standa yrði að taka eldri áform um uppbyggingu stjórnarráðsins á reitnum til endurskoðunar. Reykjavíkurborg lýsir sig reiðubúna að þróa stjórnarráðsreitinn með framtíðarþarfir Listaháskóla Íslands og stjórnarráðsins í huga.

Ef ekki yrði að byggingu Listaháskóla á reitnum vill borgarráð að öðrum kosti byggja almennar leiguíbúðir, í samræmi við viðræður borgarinnar og tveggja ráðuneyta um lóðir undir leiguíbúðir.