Fengu rjómatertu fyrir þorskinn

„Þetta eru ákveðin tímamót því botnsjávarfiski hefur ekki verið landað á Akranesi frá vorinu 2008,“ er haft eftir Regínu Ásvaldsdóttur, bæjarstjóra á Akranesi sem færði í gær áhöfn Sturlaugs H. Böðvarsson rjómatertu áður en togarinn lét úr höfn.



Tilefnið var að togarinn landaði 90 tonna afla sem aðallega var þorskur. Haft er eftir Regínu að miklu skipti fyrir bæjarlífið á Akranesi að togararnir landi þar frekar en í Reykjavík. Gleðilegt sé hvað umsvif HB Granda hafi aukist í bænum með tilheyrandi fjölgun starfa.