Fjölskyldum stúlknanna nóg boðið

Daði Freyr Kristjánsson sem dæmdur var í þriggja ára fangelsi  fyrir að nema tvær sjö ára stúlkur á brott úr strætóskýli við verslun Krónunnar í Árbæ í janúar á síðasta ári hefur áfrýjað dómnum til Hæstaréttar. Daði Freyr var jafnframt dæmdur til þess að greiða hvorri stúlku fyrir sig 800 þúsund krónur í bætur.

Foreldrar stúlknanna fengu þessar upplýsingar í dag en þeim voru birtar áfrýjunarstefnur í dag.

Þar kemur fram að Daði Freyr gerir þær kröfur að refsing hans verði milduð og einkaréttarkröfur verði lækkaðar.

Faðir annarrar stúlkunnar segir að fjölskyldunum sé brugðið. Þau hafi ákveðið að tjá sig ekkert um málið, hvorki á meðan á rannsókn stóð né eftir að dómur féll. En fyrst hann gat ekki unað dómnum og fari nú fram á að refsing hans verði lækkuð, þá sé maðurinn að biðja um leiðindi. Hann sé bara að hringla í þeim og kerfinu og nú hafi þau fengið nóg.

Daði Freyr er 33 ára. Hann kom að máli við stúlkurnar í janúar í fyrra og sagðist hafa séð þær hnupla sælgæti og þær yrðu að koma með honum, annars myndi hann hringja á lögregluna. Hann ók svo með stúlkurnar á afvikinn stað við Rauðavatn þar sem hann settist aftur í hjá þeim.

Hann kyssti aðra stúlkuna á kinnina og þuklaði á þeim báðum utan klæða. Þegar þær brugðust illa við ók hann með þær til baka og hleypti þeim úr bílnum.

Daði Freyr var ákærður fyrir frelsissviptingu, kynferðisbrot gegn börnum og brot gegn 193. ákvæði hegningarlaga, sem kveður á um barnsrán. Hann játaði sök skýlaust og var sakfelldur fyrir alla ákæruliði.

Stúlkurnar hafa glímt við misalvarlegar afleiðingar vegna brotanna. Faðir annarrar stúlkunnar segir hana ekki geta sofið eina í herbergi, hún fái martraðir og verði skelkuð í myrkri. Hún hefur þurft að sækja meðferð hjá Barnahúsi og Barna- og unglingageðdeild vegna þessa.