Óviðunandi ástand við Tjörnina

Aldrei frá upphafi mælinga á fuglalífi Reykjavíkurtjarnar árið 1973 hafa andapör verið jafnfá og á síðasta ári. Varpafkoman var jafnframt ein sú lélegasta sem mælst hefur.

Þetta kemur fram í skýrslu sem Ólafur K. Nielsen, vistfræðingur, og Jóhann Óli Hilmarsson, formaður Fuglaverndarfélags Íslands, unnu fyrir borgaryfirvöld.

„Fimm andategundir hafa verið árvissir varpfuglar á þessu tímabili: stokkönd, gargönd, duggönd, skúfönd og æður. Varpstofnum gagandar, duggandar og æðar hefur hnignað verulega og að óbreyttu munu þessar tegundir hverfa úr fuglafánu Tjarnarinnar innan fárra ára,“ segir í skýrslunni.

Þrjár meginskýringar eru taldar líklegastar á lélegri varpafkomu: fæðuskortur, afrán og hnignun búsvæða. „Tjörnin er fuglagarður í miðri borg og umsjón og ábyrgð þessa svæðis er á hendi borgaryfirvalda. Ástand mála við Tjörnina er fullkomlega óviðunandi og í engu samræmi við mikilvægi Tjarnarfuglanna fyrir borgarbúa,“ segir í skýrslunni.

Í henni er lagt til að hafið verði ræktunarstarf, líkt og stundað var á árunum 1956 til 1970, þegar egg voru klakin og ungarnir aldir á Tjörninni. Jafnframt að ráðinn verði eftirlitsmaður til að sjá um umhirðu fuglanna. „Nýleg endurheimt votlendis í friðlandinu í Vatnsmýri er af hinu góða og þessum tilraunum veður haldið áfram á árinu 2014.“

Framkvæmdirnar í Vatnsmýrinni hafa staðið yfir frá árinu 2012 að frumkvæði Norræna hússins í samstarfi við Reykjavíkurborg og Háskóla Íslands. Jarðvegur hefur verið fjarlægður og yfirborðið lækkað. Þannig verður búsvæðið blautara sem leiðir til þess að kjörlendi, sérstaklega fyrir endur til að verpa í, stækkar.

Skýrsluhöfundar segja að framkvæmdirnar hafi haft jákvæð áhrif á fuglalífið. Kríuvarp hafi verið í uppsveiflu og endur komið upp ungum undir verndarvæng hennar. „Það er von okkar að þessar breytingar hafi jafnframt áhrif á varp anda, það þéttist og fái vernd í friðlandinu.“