Ráðherrar ramba inn á Pöbbkviss

Stefán Pálsson sagnfræðingur er, sem kunnugt er, einn helsti spurningamaður landsins, spurninganörd – hann kennir við Bjórskólann og er eftirsóttur þegar veitingahús vilja blása til barleiksins Pub-quiz eða pöbbakviss; spurningaleiks. „Ég var með pöbbkviss á Micro. Þá gengu þeir inn þrír: forsætis-, fjármála- og utanríkisráðherra og urðu pínku vandræðalegir þegar þeir sáu mig.“

Þetta var á níunda tímanum í gærkvöldi. Að sögn Stefáns pantaði þríeykið Sigmundur Davíð Gunnlaugsson forsætisráðherra, Bjarni Benediktsson fjármálaráðherra og Gunnar Bragi Sveinsson utanríkisráðherra sér hver sinn bjórinn og settust í sófa afsíðis. Spurður segist Stefán ekki hafa metið það sem svo, á þeirri stundu, að þeir væru mættir til keppni, enda urðu þeir fremur kindalegir þegar þeir sáu spurningamennina á staðnum. „Nei, sem er synd. Ég hefði tekið því fagnandi ef þeir hefðu skráð sig til leiks. Ég og Sigmundur Davíð erum samstúdentar þótt við þekkjumst nú ekki mikið. En, þeir hefðu reyndar ekki átt séns. Kjartan Guðmundsson blaðamaður var við annan mann að keppa og þeir unnu með yfirburðum.“

Stefán segir þá félaga ekki hafa staldrað lengi við. Og þegar Brynjar Níelsson alþingismaður mætti skömmu síðar greip hann í tómt því þá voru þeir farnir. „Sigmundur Davíð mætir víst öðru hvoru á Micro. Enda staðurinn í eigu Skagfirðinga,“ segir Stefán og bætir því við að þetta sé besti bar borgarinnar.