„Hefur verið vandamál að útfæra lög varðandi vörumerkingar“

Efnahags og viðskiptanefnd fundaði í dag með forráðamönnum ÁTVR varðandi vörumerkjaumræðuna sem hefur verið á alþingi undanfarin misseri.

„Við erum að fara funda með ÁTVR varðandi vörumerkjaumræðuna og mun nefndin kynna sér þeirra sjónarmið,“ segir Frosti Sigurjónsson, formaður efnahags- og viðskiptanefndar Alþingis, í samtali við fréttastofu Vísis.

„Á alþingi er til umræðu breyting á löggjöf varðandi líkindi á óáfengum og áfengum vörum og nefndin er í dag að fræðast út á hvað þetta gengur.“

„Það er auglýsingabann á áfengum vörum en það hefur verið vandamál að útfæra lög og ákvæði í reglugerðinni til þess að umrædd lög haldi. Það er til að mynda verið að selja Ópal snaps í ríkinu en á sama tíma er einnig selt Ópal sælgæti í matvöruverslunum. Það er ein umræða en síðan verður einnig farið yfir sölu á óáfengi öli og áfengu og hvernig lögin koma við þær vörur.“

„Það hefur verið hægt að auglýsa óáfenga ölið án þess að áfenga ölið hafi verið bannað. Öll reglugerðin í tengslum við þetta mál er bara mjög flókin og við í nefndinni erum að kynna okkur þessi mál í dag.“

„Það var því tekin sú ákvörðun að fá ýmsa hagsmunaaðila á fund með okkur og fá að sjá með berum augum hvað ÁTVR er að glíma við. Í leiðinni verður einnig farið yfir rekstur stofnunninnar í heild sinni.“