Ekkert ballbann í Borgó

„Við viljum koma því til skila að okkar skipulag hefur komið mjög vel út og viljum að svipuðu skipulagi verði komið á í fleiri skólum,“ segir Ásta Laufey Aðalsteinsdóttir, framhaldsskólakennari og einn forvarna- og félagsmálafulltrúa Borgarholtsskóla. Borgarholtsskóli hefur endurskipulagt dansleikjamál skólans og hefur nýja skipulagið komið ákaflega vel út á þessu skólaári.

„Á árshátíðinni hjá okkur var húsið opnað klukkan 19.00 og húsinu var lokað klukkan 20.30. Nemendur fengu ekki að fara út og koma aftur inn eftir klukkan 20.30. Þetta gerir það að verkum að nemendur eru ekki að fara í partí á milli matar og balls til þess að drekka áfengi,“ útskýrir Ásta Laufey.

Það hefur tíðkast í sumum skólum, og þá helst á árshátíðum skólanna, að nemendur mæta í matinn og fara svo í partí þar sem gjarnan er drukkið eins mikið magn áfengis og hægt er fyrir ballið, sem hefst síðar sama kvöld. Það verður til þess að nemendur mæta gjarnan mjög drukknir og við vitum öll hverjir fylgifiskar ofneyslu áfengis geta verið, líkt og ofbeldi og önnur brot.

Aðstandendur dansleikja í Borgarholtsskóla nota áfengismæla til þess að láta þá blása sem grunaðir eru um ölvun. „Við byrjuðum að nota áfengismæla árið 2009 og notuðum þá mjög mikið. Þá var fólk látið blása þegar það mætti á ballið. Við lentum í þeim vandræðum að sjúkraherbergið varð fullt af fólki,“ segir Ásta Laufey.

Í dag eru þeir sem grunaðir eru um ölvun látnir blása. „Það voru fimm nemendur á árshátíðinni sem voru látnir blása og þá var hringt í foreldra þeirra og nemendurnir sóttir. Ef upp kemst um ölvun nemenda á balli hjá okkur fær sá aðili ekki aðgang að næsta balli,“ útskýrir Ásta Laufey.

Hún segir ástandið aldrei hafa verið eins gott og í vetur í Borgarholtsskóla. „Á busaballinu í haust komu upp tíu tilvik á 700 manna balli. Það voru svo bara fjórir einstaklingar með vesen og voru þeir aðilar ekki einu sinni í skólanum.“

Borgarholtsskóli kaupir öryggisgæslu hjá fyrirtækinu Go Security og ber því vel söguna. „Starfsmenn fyrirtækisins hafa flestir reynslu og hafa margir hverjir unnið í tengslum við áfengisráðgjöf. Þeir fylla út skýrslu með upplýsingum um ölvaða einstaklinginn. Foreldrar barnanna kvitta svo undir þegar þeir sækja ölvaða einstaklinginn. Eins og fyrr segir fær sá aðili ekki aðgang að næsta balli.“

Ásta Laufey vill gjarnan að fleiri skólar taki upp skipulag Borgarholtsskóla. Banni partíin sem eru á milli matar og balls á árshátíðum og biðji foreldra vinsamlega um að leyfa ekki eftirlitslaus partí í kringum skólaböllin.

„Margir foreldrar unglinga hafa áhyggjur af því að börnin þeirra hefji áfengisdrykkju í framhaldsskóla. Við viljum minnka líkurnar á því að það gerist og halda þeim góða árangri sem náðst hefur í grunnskólum og samræma reglur í framhaldsskólum í tengslum við áfengisneyslu,“ segir Ásta Laufey og bætir við að ástandið hafi ekki alltaf verið svona gott í Borgarholtsskóla.

Eins og Fréttablaðið greindi frá í gær hafa stjórnendur Menntaskólans við Sund sett á dansleikjabann. „Ástæðan fyrir þessu dansleikjabanni er að okkur hefur fundist hlutirnir ekki hafa gengið nógu vel og það hefur verið allt of mikið um ölvun,“ sagði Már Vilhjálmsson, rektor Menntaskólans við Sund, í viðtali við Fréttablaðið. Mikil drykkja og önnur brot á árshátíð MS sem fram fór í Gullhömrum fyrir skömmu fylltu mælinn og hefur því verið sett á svokallað dansleikjabann.

)