Málstofa um neyðarviðbrögð

Rauði krossinn á Íslandi boðar til málstofu um verkefnið „Greining á þáttum sem hindra eða tefja að alþjóðlegar bjargir geti borist til Íslands á neyðartímum og tillögur um áhættuminnkandi aðgerðir“ á miðvikudaginn.

Málþingið hefst kl. 9 og stendur til kl. 12 í húsi Rauða krossins í Efstaleiti 9 í Reykjavík.

Málþingið er í kjölfar greiningar sem lögfræðistofan LOGOS annaðist í samstarfi við Rauða krossinn á Íslandi á mögulegum þáttum í laga- og reglugerðaumhverfi Íslands sem geta hindrað eða hamlað aðkomu erlends hjálparliðs til Íslands.

Verkefnið var unnið samhliða í fimm Evrópulöndum, Íslandi, Finnlandi, Írlandi, Lettlandi og Póllandi, og samhæft af Rauða krossinum á Íslandi.

Markmið greiningarinnar var að greina mögulegar hindranir í laga- og reglugerðaumhverfi Íslands sem varða alþjóðlega aðstoð og innleiðing á viðmiðunarreglum ESB um þjónustu ríkis í skaðalandi við utanaðkomandi aðstoð.

Einnig á hún að vera leiðbeiningar til stjórnvalda um hvernig hægt sé að minnka áhættu af töfum eða hindrunum í aðkomu alþjóðlegra bjarga til Íslands á neyðartímum.

Á málþinginu verða fluttar fjórar framsögur og í kjölfar þeirra verða pallborðsumræður.

Nánari upplýsingar um dagskrá og efnistök má nálgast á vefsíðu Rauða krossins.