Sýndu Hjördísi stuðning

Mótmæli fóru fram í gær fyrir framan fangelsið í Horsens í Danmörku þar sem Hjördís Svan Aðalheiðardóttir er í haldi. Boðað var til mótmælanna á danskri Facebook-síðu.

Hjördís fór með dætur sínar með leynd til Íslands síðastliðið sumar, í andstöðu við úrskurð danskra dómstóla sem höfðu dæmt barnsföður hennar forræði. Hún var úrskurðuð í fjögurra vikna gæsluvarðhald þann 12. febrúar síðastliðinn. Þá hafði henni þegar verið haldið af danskri lögreglu í tvo daga án þess að nokkur fengi að heimsækja eða tala við hana, ekki einu sinni lögmaður hennar. Á áðurnefndri Facebook-síðu er þetta kallað gróft mannréttindabrot.

„Við vorum um tuttugu manns sem mættu og vildum sýna samúð okkar með Hjördísi,“ segir Laila Smillas Egensberg, ein þeirra sem stóðu fyrir mótmælunum. Hún segir viðstadda hafa fengið að vera fyrir framan fangelsið í um tvo tíma, syngja lög og færa lögreglu skilaboð til Hjördísar. Hún segir skammarlegt að íslensk stjórnvöld hafi framselt Hjördísi og börn hennar til Danmerkur.

„Mér finnst þetta mjög sorgleg staða fyrir Ísland,“ segir Laila. „Þetta er svo ósanngjarnt gagnvart börnunum að ég á engin orð.“

Laila segir að til standi að gera meira á næstunni til að sýna stuðning við Hjördísi.