Heimasíða um andlát eiginmannsins

Ástríður Pálsdóttir lýsti ferlinu sem hún þurfti að ganga í gegnum til að fá afhentar sjúkraskrár og gögn um andlát eiginmanns síns í helgarviðtali Fréttablaðsins fyrir nokkru.

Hún hefur nú opnað heimasíðu þar sem hún gefur leiðbeiningar og ráð byggð á eigin reynslu til þeirra sem standa í sömu sporum og hún.

Á heimasíðunni er einnig að finna allar sjúkraskrár mannsins, öll samskipti við stjórnendur Landspítala og landlæknisembættisins auk kæru Ástríðar til lögreglu á hendur Landspítala.

„Aðalástæðan fyrir því að ég opna heimasíðuna er vegna þess að þar er sönnunin um vanræksluna sem maðurinn minn varð fyrir við meðferð á Landspítalanum,“ segir Ástríður. 



Það getur reynst sérstaklega erfitt fyrir aðstandendur að fá afhentar sjúkraskrár látins einstaklings, vegna persónuverndarsjónarmiða.



Þröng heimild er í lögum fyrir aðgang aðstandenda að sjúkraskrám. Hingað til hafa aðstandendur getað áfrýjað til velferðarráðuneytis ef landlæknir synjar aðgangi. Í janúar síðastliðnum var lögum um sjúkraskrár hins vegar breytt á þann hátt að ákvarðanir embættisins eru endanlegar á stjórnsýslustigi og verður ekki skotið lengur til ráðherra.