"Ég ætla að gera allt sem ég get til að hjálpa systur minni svo hún geti átt betra líf“

Hermann Helenuson, þrettán ára töframaður með áberandi fallegt hjartalag vakti verðskuldaða athygli í öðrum þætti af Ísland Got Talent síðustu helgi. Hermann er staðráðinn í að hjálpa sautján ára systur sinni, Karen Helenudóttur, ef hann sigrar keppnina en verðlaunaféð er tíu milljónir krónur.

Systir þín, viltu segja okkur hvað amar að henni í bakinu?

„Systir mín er með mikla hryggskekkju sem er einungis hægt að laga með aðgerð sem gæti verið lífshættuleg. Aðgerðin kostar sex til átta  milljónir króna og það tæki systur mína sex ár að safna fyrir aðgerðinni. Ég ætla að gera allt sem ég get til að hjálpa systur minni svo hún geti átt betra líf," svarar Hermann.

Spurður um töfrabrögðin sem komu honum áfram í keppninni svarar Hermann: 

„Þetta er uppáhalds atriðið mitt. Troðfullt af ótrúlegum töfrabrögðum og mögnuðum sjónhverfingum. Töfradúfan sem birtist úr pottinum heitir Sóley. Hún er þriggja ára gömul og getur gert ótrúlega hluti.“



Hverju megum við eiga von á frá þér í keppninni?

„Ég ætla að koma öllum á óvart. Ég er búinn að vera að æfa svaka flott atriði sem aldrei hefur sést áður á Íslandi. Nú eru stífar æfingar alla daga og ég ætla að sjá til þess að undanúrslitin verði ógleymanleg," útskýrir hann.

„Ég hvet alla til að kjósa mig áfram því ég lofa því að koma með ennþá flottara atriði og ég vill líka þakka fjölskyldunni minni og Einari Mikael fyrir að hafa stutt mig áfram og hjálpa mér að hjálpa systur minni.“

Hér má sjá atriði Hermanns.