Ekki búið að ganga frá meðferðarúrræðum fyrir piltinn

Ekki hefur enn verið gengið frá meðferðarúrræðum fyrir unglingspiltinn sem var sakfelldur fyrir manndrápstilraun á níu ára stúlkubarni í Hafnarfirði fyrr í vikunni. „Ekki hefur verið gengið frá því hvaða úrræði það verða, en verið er að vinna við að gera áætlun um meðferðarúrræði,“ segir Rannveig Einarsdóttir sviðsstjóri Fjölskylduþjónustu Hafnarfjarðar.

Rannveig vill ekki tjá sig um athugasemdir sem starfsmenn fjölskyldusviðs gerðu við þá ákvörðun að útskrifa drenginn þremur dögum fyrr en til stóð. Degi eftir að hann útskrifaðist réðst drengurinn á stúlkuna með hnífi.

Enn virðist ríkja ákveðin óvissa um málefni drengsins. Að sögn Rannveigar verður líðan og ástand drengsins metið með tilliti til hvort eða hvenær vistun hans lýkur. „Ekki hefur verið ákveðið hvað lengi drengurinn verður vistaður en það verður  metið með tímanum hvort og hvenær vistun lýkur. Í dómnum kemur fram að matsmenn segi að horfur varðandi það verði ekki metnar fyrr  en að nokkrum árum liðnum.“