Íslandsmótinu í sundi lokið

Fínn árangur náðist á Íslandsmótinu í sundi í 50 metra laug um helgina. Alls féllu níu Íslandsmet og ellefu aldursflokkamet á mótinu.

Í 1500 metra skriðsundi kvenna féllu tvö aldursflokkamet. Sunneva Dögg Friðriksdóttir ÍRB sigraði á tímanum 17:37,37 mínútum sem er bæting á níu ára gömlu stúlknameti Auðar Sifjar Jónsdóttur - 17:44,70.

Eydís Ósk Kolbeinsdóttir ÍRB hafnaði í öðru sæti á tímanum 17:48,38 sem er bæting á telpnameti Sunnevu Daggar -  18:08,04.

Þá kláraði A-sveit SH karla daginn á Íslandsmeti í 4x100 metra fjórsundi þegar þeir syntu á 3:55,08 mínútum og bættu þar með gamla metið - 3:56,95 - sem einnig var í eigu SH. Það met var sett fyrir þrem árum.

Eftir skemmtilegt og gott mót er gaman að gefa nokkur auka verðlaun en á ÍM50 eru gefnir fjórir bikarar fyrir árangur á mótinu og síðastliðið ár.

Sigurðarbikarinn hlýtur sá sem skorar hæst á ÍM50 í bringusundi samkvæmt opinberri stigatöflu Alþjóðlega Sundsambandsins (FINA). Í þetta skiptið hreppir Hrafnhildur Lúthersdóttir þessi verðlaun fyrir Íslandsmet sitt í 100 metra bringusundi á mótinu.

Kolbrúnarbikarinn hlýtur sú kona sem á stigahæsta sundið samkvæmt töflu FINA á milli ÍM50 móta. Eygló Ósk Gústafsdóttir tekur þessi verðlaun fyrir Íslandsmetasundið sitt í 200 metra baksundi fyrir um tveim vikum í Danmörku.

Pétursbikarinn hlýtur sá karl sem á stigahæsta sund, skv. Töflu FINA, á milli ÍM50 móta. Anton Sveinn McKee tekur þessi verðlaun fyrir 200 metra bringusundið sem hann synti í Barcelona í byrjun ágúst á síðasta ári.

Að lokum er það Ásgeirsbikarinn, einnig kallaður Forsetabikarinn, en hann er veittur af forseta Íslands, til minningar um Ásgeir Ásgeirsson, fyrrverandi forseta Íslands, til þess einstaklings sem á besta afrek á ÍM50 hverju sinni.

Eygló Ósk Gústafsdóttir hreppir bikarinn fyrir tímann sinn í 100 metra baksundi þegar hún tók fyrsta sprett í boðsundi og jafnaði Íslandsmetið sitt sem hún setti í Danmörku fyrir rúmu ári síðan.