Allir samþykktu yfirvinnubann

Starfsmenn Elkem Ísland  kusu í dag um yfirvinnubann og var samþykktin einróma. Sjötíu og einn greiddi atkvæði og sjötíu þeirra studdu yfirvinnubann. Einn seðill var auður og enginn var á móti. Þetta kemur fram á vefsíðu Verkalýðsfélags Akraness.

Kjarasamningur Elkem Ísland á Grundartanga rann út þann 1.desember 2013 og hafa viðræður staðið við Samtök atvinnulífsins síðan þá en hafa þær engan árangur borið. Fundað var hjá ríkissáttasemjara í gær og þegar ljóst var að engin stefnubreyting hafði orðið af hálfu Samtaka atvinnulífsins óskaði Verkalýðsfélag Akraness eftir því að skráð yrði í fundargerðarbækur ríkissáttasemjara að viðræður væru árangurslausar, en það er ein af grunnforsendum þess að hægt er að boða til yfirvinnubanns á löglegan hátt.

Félagið vonast til að ekki þurfi að koma til yfirvinnubanns en til að þessi deila leysist þá verði eitthvað innihald að vera í því tilboði sem berst frá Samtökum atvinnulífsins.