Bjartir dagar sagðir kosningahátíð á kostnað bæjarbúa í Hafnarfirði

Bæjarfulltrúar Sjálfstæðisflokksins segja meirihluta Samfylkingar og Vinstri grænna í bæjarstjórn ætla að efna til kosningahátíðar á kostnað bæjarsjóðs.

Sjálfstæðismenn vísa til þeirrar „skyndiákvörðunar“ meirihlutans að halda bæjarhátíðina Bjarta daga að þessu sinni í apríl. Menningar- og ferðamálanefnd bæjarins hafi hins vegar lagt til að viðburðurinn eða sambærileg hátíð yrði ekki haldin um mánaðamótin maí/júní líkt og verið hafi heldur síðar á árinu. Það hafi verið gert í ljósi eindregins vilja sem komið hafi fram á stefnumótunarfundi í haust.

„Nú hefur hins vegar verið ákveðið, án nokkurs samráðs, að ganga þvert á vilja fundarins og flýta hátíðinni. Bjartir dagar verða því nú haldnir í lok apríl eða um mánuði fyrir bæjarstjórnarkosningar. Meirihlutinn blæs sumsé til kosningahátíðar á kostnað bæjarbúa, - án faglegs samráðs eða eðlilegs undirbúnings fyrir bæjarhátíð sem þessa,“ segir í bókun minnihluta Sjálfstæðisflokks.

Leggi þá fram tillögu um frestun

Bæjarfulltrúar Samfylkingarinnar og VG sögðu að þó að á fundinum síðastliðið haust hafi verið rætt hvort endurskoða ætti tímasetningu og fyrirkomulag hátíðarinnar væri það beinlínis rangt hjá sjálfstæðismönnum að niðurstaðan hafi verið sú að leggja af Bjarta daga eða halda hátíðina á tilteknum öðrum tíma.

Menningar- og ferðamálanefnd hafi ákveðið samhljóða að endurskoða tímasetningu hátíðarinnar. Það hafi fyrst og fremst byggst á því að ekki væri heppilegt að halda hátíðina á hefðbundnum tíma í ár þar sem hún myndi bera upp á sömu helgi og kosningar til sveitarstjórna. Samþykkt hafi verið samhljóða á fundi á máundaginn var að hátíðin syldi haldin í tengslum við Sumardaginn fyrsta og tengd fleiri viðburðum á sviði menningarmála um það leyti.

„Ef það er vilji bæjarfulltrúa Sjálfstæðisflokksins að öllum reglulegum viðburðum á vegum menningar- og ferðamálanefndar verði frestað fram yfir kosningar þá er ekkert sem kemur í veg fyrir að þeir leggi fram tillögur þess efnis í menningar- og ferðamálanefnd,“ bókuðu fulltrúar meirihlutans.