Flytur erindi um viðhorf stjórnvalda til hælisleitanda

Þriðjudaginn 25. febrúar mun Björn Reynir Halldórsson flytja erindi sem kallast „Gervasoni-málið -Viðhorf stjórnvalda og almennings til hælisleitanda.“

Erindið er hluti af hádegisfyrirlestraröð Sagnfræðingafélags Íslands sem ber yfirskriftina „Nýjustu rannsóknir í sagnfræði.“

Fyrirlesturinn fer fram í fyrirlestrasal Þjóðminjasafns Íslands og hefst klukkan 12.05.

Farið verður yfir mál sem átti sér stað árið 1980 þegar Frakkinn Patrick Gervasoni sótti um pólitískt hæli á Íslandi á grundvelli yfirvofandi fangelsisdóms fyrir að neita að gegna herþjónustu.

Umsókninni var hafnað en skiptar skoðanir voru um ákvörðunina og hatrammar deilur spunnust um málið.

Í fyrirlestrinum verður lögð megináhersla á að greina frá hvernig meðferð umsókn um pólitískt hæli fékk á þessum tíma, hversu vel íslensk stjórnsýsla var í stakk búin til að takast á við málið og hvað réði mestu um ákvörðunina. 

Að auki verður fjallað um deiluna í samfélaginu og sjónarmið beggja aðila greind.

Loks verður rakið hvernig óstöðugt stjórnmálaástand á Íslandi hafði áhrif á framgang og lausn málsins.