Ný forvarnarstefna Reykjavíkurborgar

Forvarnarstefna Reykjavíkurborgar 2014-2019 er komin út. Áhersla er lögð á samfélag án ofbeldis og virkni og þátttöku barna og ungmenna.

Þá er lögð áhersla á að auka sjálfsvirðingu og virðingu fyrir öðrum ekki síst til að draga úr hvers konar áhættuhegðun, til að mynda vímuefnaneyslu. 

Stefnan er unnin með hliðsjón af reynslu og árangri af forvörnum í borginni og þeirra samfélagsbreytinga sem orðið hafa síðustu ár.

Kannanir sýna að börnum og ungmennum líður almennt vel og að þau eru félagslega virk. Einnig dregur úr áhættuhegðun milli ára eins og áfengisneyslu, reykingum og neyslu annarra vímuefna.

Fram kemur í fréttatilkynningu frá Reykjavíkurborg að þrátt fyrir góðan árangur í forvörnum á unglingastigi grunnskólanna þarf að gera betur á fyrstu árunum eftir grunnskóla sér í lagi hjá þeim hópi sem hvorki fer í nám eða vinnu.

Þá hafa nýjar rannsóknir staðfest að ofbeldi er vandamál meðal barna og unglinga og því vill Reykjavíkurborg gera sitt til að koma í veg fyrir það.

Stefnunni er skipt í kafla eftir áherslum á hverju aldurstigi, það er  0-5 ára, 6-9 ára, 10-12 ára, 13-15 ára og að lokum 16 ára og eldri.

Fornvarnarstefnan er unnin af fagaðilum sem starfa víða í borginni og var hún gerð með hliðsjón af gildandi lögum, reglugerðum og alþjóðlegum sáttmálum er varða velferð og hag barna ásamt Mannréttindastefnu Reykjavíkurborgar, aðalnámskrá leikskóla, grunnskóla og framhaldsskóla.