Hótar að sprengja bíl lögregluþjóns á Seyðisfirði

Karlmaður á Seyðisfirði hótaði yfirlögregluþjóni Seyðisfjarðarumdæmis í gegnum Facebook. „Herra Óskar Bjartmarz, þú réðst á mig eins og svín. Núna veit ég hvar þú býrð... ef ég væri þú færi ég varlega í það að setja bílinn í gang á morgnana“ Maðurinn birti þessi orð á Facebook síðu sinni samkvæmt Austurfrétt.

Þetta er í annað sinn sem maðurinn hótar lögreglumönnum á svæðinu, en hann ruddi sér leið inn á heimili lögreglukonu í bænum í ágúst í fyrra. Lögreglukonan var þó á vakt, en fjögurra ára sonur hennar var heima í pössun.

Í frétt Austurfréttar segir að með hótuninni hafi fylgt óskýr mynd af víravirki og ályktað var að um sprengju væri að ræða. Lárus Bjarnason, sýslumaður og lögreglustjóri á Seyðisfirði, segir Austurfrétt að málið sé litið alvarlegum augum. Rannsókn er hafin á málinu og segir Lárus að það verði rannsakað sem sakamál.