Stofnandi Pirate Bay handtekinn í Laos

Fredrik Neij, einn stofnanda vefsíðunnar Pirate Bay, var handtekinn á landamærum Laos og Taílands í gær. Þetta staðfestir lögmaður Neij í Svíþjóð, en Neij hefur verið eftirlýstur frá árinu 2010.

Neij var tekinn höndum ásamt eiginkonu sinni þegar þau reyndu að fara yfir landamærin til Nong Khai héraðs í Taílandi.

„Ef ég skil þetta rétt þá er starfsfólk sænska sendiráðsins á leið til hans,“ segir lögmaðurinn Jonas Nilsson í samtali við sænska ríkisútvarpið. „Hann hefur jafnframt fengið skilaboð um að flytja eigi hann til Svíþjóðar.“

Sænskur áfrýj­un­ar­dóm­stóll staðfesti árið 2010 að að þrír for­svars­menn Pira­te Bay skyldu sæta fangels­is­refs­ingar, auk þess að greiða sekt. Neij hefur verið á flótta síðan.

Neij stofnaði Pirate Bay ásamt þem Gottfrid Svartholm Warg og Peter Sunde árið 2003.