Sjúkratryggingar rúnar trausti

„Það er stórfrétt að stjórnvöld séu ekki tilbúin til að samþykkja gjörðir samninganefndar Sjúkratrygginga Íslands. Þá spyr ég, hver er trúverðugleiki samninganefndarinnar?“ segir Unnur Pétursdóttir, formaður Félags sjúkraþjálfara.

Sjúkratryggingar Íslands (SÍ) gengu frá samningi við Félag sjúkraþjálfara fyrr á þessu ári, en heilbrigðisráðherra og fjármálaráðherra neita að staðfesta samninginn.

Unnur segir þetta í fyrsta skipti í þrjátíu ára sögu samninga sjúkraþjálfara við ríkið sem samninganefnd ríkisins er gerð afturreka af ráðherra.

„Ástæða þess að ég hef ekki getað staðfest samning við Félag sjúkraþjálfara er að óbreyttur samningur samræmist ekki verðlagsmarkmiðum fjárlaga,“ segir Kristján Þór Júlíusson heilbrigðisráðherra. Hann segir stöðuna sem upp sé komin vera mjög óþægilega.

Aðspurður segir Kristján samninginn ekki ganga þvert á markmið ríkisins, heldur séu í honum tæknileg atriði sem þurfi að fara betur yfir. „Lengra komust Sjúkratryggingar ekki í samningunum og nú þarf ráðuneytið að fara yfir stöðuna,“ segir Kristján. Hann gerir ráð fyrir að efnt verði til nýrra viðræðna. 

„Við seildumst ansi langt til að koma til móts við þá,“ segir Unnur. Hún segir viðræðurnar hafa byggst á samningstilboði frá stjórnvöldum. Upphafleg krafa sjúkraþjálfara var átta prósent hækkun á gjaldskrám. Niðurstaðan var hins vegar 2,8 prósent hækkun, en aðrir þættir komu á móti svo sem nýir gjaldaliðir í gjaldskrá.

„Undrandi er ekki nógu sterkt orð yfir það hvernig maður upplifir svona. Hvaða samningsumboð hefur samninganefnd SÍ? Eins og staðan er nú er þessi samninganefnd algjörlega rúin trausti í mínum augum,“ segir Unnur.

Samningur við sjúkraþjálfara er ekki eini samningur SÍ í uppnámi. Ráðherra skrifaði undir samning við sérgreinalækna undir lok síðasta árs sem tekið hefur gildi, en enn hefur ekki verið gengið frá fjármögnun hans. 

„Það er ekki óskastaða að skrifa undir samning sem ekki er búið að fjármagna. Við kláruðum að semja, en svo hefur það því miður gerst að þetta strandar svona á ráðuneytunum,“ segir Heiðar Örn Arnarson, upplýsingarfulltrúi SÍ.