Engar aðgerðir gegn kennitöluflakki ári eftir tillögur stýrihóps

„Okkur undrar mjög hvað stjórnvöld og kerfið allt virðist vera þolinmótt gegn þessari brotastarfsemi sem kennitöluflakk er því að að okkar mati verður ríkissjóður af tugum milljarða á ári hverju vegna svona svindls og það eru miklir hagsmunir fyrir samfélagið allt að taka á þessu.“

Þetta segir Halldór Grönvold, aðstoðarframkvæmdastjóri Alþýðusambandsins, en sambandið tók þátt í vinnu starfshóps sem skilaði fyrir réttu ári tillögum að aðgerðum til að verjast kennitöluflakki. Kennitöluflakk felur í sér að fyrirtæki sem sér fram á gjaldþrot færir eignir sínar og rekstur í nýtt félag en skilur skuldirnar eftir á gömlu kennitölunni. Tillögurnar fólu í sér hert viðurlög, til að mynda að heimild til að slíta óvirkum félögum, sem ekki hafa skilað ársreikningum í þrjú ár, verði nýtt.

Halldór segir að ASÍ hafi meðal annars fylgt málinu eftir með því að senda þremur ráðherrum greinargerð, í október síðastliðnum, þar sem taldar voru upp sextán tillögur að aðgerðum til úrbóta. „En við höfum nákvæmlega engin viðbrögð fengið.“

Skúli Jónsson, sviðsstjóri skráasviðs hjá Ríkisskattstjóra, segir skynsamlegt að setja kraft í slíkar aðgerðir til að losna við félög sem ekki standa við skyldur sínar eða eru hætt starfsemi, enda fari í þau nokkur vinna, meðal annars í að áætla á þau skatt.

„Félög sem ekki hafa fyrir því að skila inn ársreikningi þrjú ár í röð hafa ekki mikinn tilverurétt. Ef þau eru í einhvers konar vafasömum rekstri sem þau þora ekki að láta aðra vita um þá er samfélagið betur sett með að þau hverfi úr fyrirtækjaflórunni,“ segir Skúli og bætir við að um sé að ræða um 700 félög.

„Það hefur verið krafa utan úr samfélaginu að tekið verði á þessum málum,“ Segir Katrín Jakobsdóttir, formaður VG. „Í ljósi þess að þarna áttu aðkomu flestir aðilar vinnumarkaðarins voru þessar tillögur var þarna ákveðinn meðbyr sem hefði verið hægt að nýta,“ sagði Katrín og bætti því við að hún vonaðist til þess að ráðherra sýni á spilin sem fyrst.

Í svari Viðskiptaráðs, sem tók einnig þátt í starfi stýrihópsins ásínum tíma, við fyrirspurn Fréttablaðsins segir að í tillögum starfshópsins hafi verið lagt til að ítarlegri greining færi fram á eðli og umfangi kennitöluflakks áður en lagabreytingartillögur yrðu lagðar fram hvað þann þátt varðar.

„Greining af þessu tagi er afar mikilvæg til að hægt sé að vinna á þessari meinsemd sem kennitöluflakk hefur verið með sem markvissustum hætti. Það mætti því segja að okkur sé farið að lengja eftir því að þessi næstu skref verði stigin í ferlinu, fremur en að hjá okkur sé uppi krafa um aðgerðir. Ef lagabreytingar byggja ekki á sterkum gögnum og greiningum er líklegt að betur sé heima setið en af stað farið.“

Ragnheiður Elín Árnadóttir, iðnaðar- og viðskiptaráðherra, segir starfshóp nú að störfum til að kortleggja málaflokkinn og sú vinna sé í fullum gangi.

„Vandamálið er að það er ekkert til sem heitir kennitöluflakk í lögum. Hópurinn er nú að afla gagna til að átta sig á umfanginu og er að vinna með Hagstofu í því að greina vandann. Ég mun ekki koma með frumvarp á þessu vorþingi, en á von á stöðuskýrslu frá hópnum fljótlega.“

Hún útilokar ekki að heimildir til að slíta félögum sem trassa ársreikningaskil verði í lokatillögum, en áherslan sé á að ná sem best utan um verkefnið.