Varna sandburði með lengri grjótgarði

Vegagerðin hyggst lengja varnargarð við ósa Markarfljóts um 250 metra.

„Tilgangur varnargarðsins er að færa ósinn sem samsvarar lengd garðsins til austurs og þar með að draga úr framburði sem safnast saman í Landeyjahöfn,“ segir í fundargerð sveitarstjórnar Rangárþings eystra sem samþykkt hefur framkvæmdina með fyrirvara um leyfi landeigenda og Fiskistofu.

Fram kemur að mat Skipulagsstofnunar sé að megináhrif af lengingunni verði færsla óss Markarfljóts til austurs. Hvorki sé líklegt að um verði að ræða neikvæð áhrif vegna landbrots upp með farvegi fljótsins né að ósinn muni færast lengra í austur en ætlað er með tilkomu garðsins.