Bland svikari fékk þriggja mánaða dóm

Karlmaður var í morgun dæmdur í þriggja mánaða óskilorðsbundið fangelsi fyrir fjársvik. Hann fékk ítrekað greitt fyrir vörur sem hann auglýsti á síðunni Bland.is án þess að afhenda vörurnar.

Þetta gerði maðurinn fimm sinnum frá 30. janúar 2013 til 19. febrúar á sama ári.

Maðurinn auglýsti til sölu hrærivél af gerðinni Kitchen aid og fékk 25.000 krónur greiddar fyrir vöruna sem skilaði sér aldrei til kaupanda.

Þann 4. febrúar auglýsti maðurinn úlpu til sölu og fékk 36.000 krónur greiddar fyrir vöruna sem einnig skilaði sér ekki.

Síðar sveik maðurinn annan notanda Bland.is með því að auglýsa til sölu úlpu. Maðurinn fékk í framhaldinu 55.000 krónur lagðar inn á reikning sinn en enginn úlpa skilaði sér til kaupanda.

Annar notandi Bland.is lagði 80.000 krónur inn á bankareikning mannsins í þeirri von um að hann væri að fjárfesta í ljósmyndavél af gerðinni Canon. Myndavélin skilaði sér aldrei.