Ósammála um að breyta þurfi lögum

Sérfræðingur í refsirétti telur ekki æskilegt að fella heimilisofbeldi með sérstökum hætti inn í almenn hegningarlög. Refsingar í heimilsofbeldismálum hafa verið að þyngjast á undanförnum árum.

Líkt og fjallað var um í kvöldfréttum Stöðvar 2 í síðustu viku þá hefur lögreglan á Suðurnesjum unnið sérstaklega í því að bæta vinnu sína í málum sem varða heimilisofbeldi. Lögregluembættið hefur í vinnu sinni rekist á nokkra veggi og lagt til að gerðar verðir breytingar á lögum til að auðvelda framgang mála þegar heimilisofbeldi á sér stað.

Jón Þór Ólafsson, lektor við lagadeild Háskóla Íslands og sérfræðingur í refsirétti, er ósammála því að breyta þurfi lögum. „Ég tel að það séu öll úrræði til staðar. Auðvitað er hægt að betrum bæta einstök ákvæði og koma einhverjum þyngingarákvæðum inn í tegnslum við þau, t.a.m. með að þyngja refsimörk í 217. grein sem fjallar um minniháttar líkamsmeiðingar,“ segir Jón Þór.

Nýlega féll dómur í Héraðsdómi Norðurlands eystra fyrir heimilisofbeldi sem komið hefur af stað umræðu um hvort að dómar séu of vægir í þessum málaflokki. Maður var ákærður fyrir að hafa ítekað beitt sambýliskonu sína ofbeldi og hótað henni lífláti. Hann var dæmdur í sex mánaða skilorðsbundið fangelsi.

Jón Þór segir dóma í þessum málaflokki hafa þyngst. Það að þyngja dóma mun hins vegar ekki leysa vandamálið.

„Það á aldrei að líðast að maður eða kona beiti annan ofbeldi. Það verður alltaf að skoða hvert mál fyrir sig. Það er hins vegar alltaf alvarlegt, sama hvort að ofbeldið gerist inn á heimili eða annars staðar, þá eru brot innan heimilisins alltaf alvarlegri.“