Jómfrúarræða Geirs Jóns fjallaði um Landeyjahöfn

„Herra forseti, Ég vil gera að umtalsefni, samgöngumál okkar Vestmannaeyinga.“

Svona hljómuðu fyrstu orðGeirs Jóns Þórissonar, fyrrum yfirlögregluþjóns hjá lögreglunni á höfuðborgarsvæðinu, á Alþingi. Hann tók sæti á þingi í dag, sem varamaður Ásmundar Friðrikssonar, en þeir eru í Sjálfstæðisflokknum.

Geir Jón fjallaði um siglingar Herjólfs frá Vestmannaeyjum í ræðu sinni og gagnrýndi það harðlega að fargjald hækki þrefalt þegar ekki er hægt að sigla til Landeyjarhafnar og þess í stað siglt til Þorlákshafnar.

„Þetta er algjörlega óásættanlegt,“ sagði Geir Jón í jómfrúarræðunni og bætti við: „Með öllu er ólíðandi að farþegar með Herjólfi greiði viðbótargjald vegna þess að Landeyjarhöfn virkar ekki.“

Geir Jón kallaði eftir bætingum á Landeyjarhöfn. „Allavega nýtist ekki höfnin til siglinga Herjólfs, alltof stóran part ársins. Hún þarf að virka allt árið ekki síður en Þorlákshöfn.“

Ræðu Geirs Jóns má sjá í spilaranum að neðan. Hann tekur til máls þegar fimm mínútur eru liðnar af myndbandinu.