„Það er mín afstaða að vinna ekki með þessu fólki“

„Það er mín afstaða að vinna ekki með þessu fólk,“ segir Dagný Jónsdóttir sem hefur verið bæjarfulltrúi Framsóknarflokksins á Akranesi á núverandi kjörtímabili. Dagný hefur ákveðið að gefa ekki kost á sér aftur eftir að hafa sóst eftir oddvitasæti flokksins.

DV greindi frá því í dag að knattspyrnukappanum Jóhannesi Karli Guðjónssyni hafi verið boðin staða oddvita flokksins í komandi bæjarstjórnarkosningum. Einnig segir þar að Dagný hafi viljað halda áfram sem fulltrúi Framsóknar í bæjarstjórn en hefði nú ákveðið að gefa ekki kost á sér.

Dagný vildi ekki tjá sig um hugsanlega lista Framsóknar í komandi bæjarstjórnarkosningum. „Enn á eftir að samþykja listann á flokksþingi, þannig að það er kannski óvarlegt af mér að fullyrða eitthvað um hann,“ segir Dagný.

„Þetta er innanflokksmál og þess vegna vil ég ekki tjá mig um þetta á annan hátt en þann að ég hef ákveðið að gefa ekki kost á mér,“ segir Dagný.

Jóhannes Karl Guðjónsson var atvinnumaður í knattspyrnu um árabil. Þórður Guðjónsson, bróðir Jóhannesar, var í framboði fyrir Sjálfstæðisflokkinn á Akranesi árið 2009. Inga Jóna Þórðardóttir, föður systir þeirra bræðra var borgarfulltrúi Sjálfstæðisflokksins í Reykjavík.