Ekki náðist saman í makríldeilunni

Sigurður Ingi Jóhannsson, sjávarútvegs- og landbúnaðarráðherra, segir það mikil vonbrigði að samningar um veiðar á makríl hafi ekki náðst á fundi svo kallaðra strandríkja á fundi í Lundúnum í dag.  Þetta kemur fram í tilkynningu ráðuneytisins.

„Við vorum þess fullviss að nú væri kominn tími til að klára þessar viðræður, sérstaklega í ljósi þess að ráðgjöf um heildarveiði fyrir yfirstandandi ár hafði verið hækkuð umtalsvert. Ráðgjöfin hafði verið hækkuð um 64% af ICES (Alþjóða hafrannsóknarráðið), en hún dugði greinilega ekki til að mati sumra strandríkjanna,“ segir Sigurður og bætir við að "í ofanálag urðum við vitni að verulegri óbilgirni Norðmanna. Þeir lögðu til að heildarveiðin yrði aukin í 1,3 milljónir tonna, sem er tæplega 50% meira en ráðgjöfin hljóðar uppá og 140% meira en ráðgjöfin fyrir árið í fyrra. Þetta er í hróplegri mótsögn við almennt viðurkennd viðmið strandríkjanna um varúðarsjónarmið og að veiðar á makríl eigi að vera sjálfbærar.“

Sigurður segir að Íslendingar hafi á undanförnum mánuðum gefið töluvert eftir til að reyna að ná samningum: „Eftir að nýja ráðgjöfin um heildarveiði barst frá ICES vikum við nokkuð frá kröfum okkar. Við höfðum náð samningsgrunni með Evrópusambandinu um hvernig væri hægt að ljúka þessu. Og það gerðum við í góðri trú. Það eru því mikil vonbrigði að aðrir skuli ekki hafa fallist á þessa lausn, því hún hefði tryggt sjálfbæra nýtingu á makríl stofninum á komandi árum.“ 

Færeyskir fjölmiðlar segja að bitist hafi verið um skiptingu 0,8 prósenta kvótans. „Þetta er umdeilanleg tala og ég vil hvorki staðfesta né neita henni,“ sagði Sigurgeir Þorgeirsson, aðalsamningamaður Íslands, við Fréttablaðið í gær.