Smálánafyrirtæki hyggjast áfrýja úrskurði

NEYTENDUR Kredia ehf. og Smálán ehf. munu ekki breyta þjónustu sinni í kjölfar niðurstöðu áfrýjunarnefndar neytendamála. Staðfestur var úrskurður Neytendastofu þess efnis að gjald fyrir flýtiafgreiðslu lánshæfismats skyldi teljast til heildarlántökukostnaðar en ekki viðbótarkostnaðar. Í samhljóða yfirlýsingum sem þau sendu frá sér segjast þau munu halda áfram að bjóða upp á þjónustuna þar til niðurstaða dómstóla liggi fyrir. Í tilkynningunni segir að fyrirtækin telji niðurstöðu áfrýjunarnefndarinnar í andstöðu við lög um neytendalán. Hingað til hafi verið boðið upp á þessa tegund lána sem séu eftirsótt af hópi fólks og henti vel við ákveðnar aðstæður. Fyrirtækin muni ekki bregðast þessum hópi fólks og ætla því að halda áfram að bjóða upp á þessi lán nema dómstólar dæmi þau ólögleg. Fyrirtækin bjóða upp á vaxtalaus smálán að loknu lánshæfismati sem taki rúma viku. Lántaka stendur hins vegar til boða flýtiafgreiðsla á lánshæfismatinu en slík afgreiðsla tekur aðeins um klukkustund og er tæplega nífalt dýrari en venjulegt lánshæfismat. Ekki er ljóst hve margir lántakar hafa nýtt sér flýtiafgreiðsluna en sé gjaldið ólöglegt gætu einhverjir átt rétt á endurgreiðslu. Ekki náðist í Leif A. Haraldsson, framkvæmdastjóra fyrirtækjanna, við vinnslu fréttarinnar.- joe