Innlent

Lögreglustjóri afhenti aðstoðarmanni gögn sem hann mátti ekki biðja um

Heimir Már Pétursson skrifar
Gísli Freyr Valdórsson mátti ekki óska eftir upplýsingum sem lögreglustjórinn á Suðurnesjum veitti honum.
Gísli Freyr Valdórsson mátti ekki óska eftir upplýsingum sem lögreglustjórinn á Suðurnesjum veitti honum. Vísir

Aðstoðarmenn innanríkisráðherra hafa ekki rétt til að óska eftir upplýsingum af því tagi sem lögreglustjórinn á Suðurnesjum sendi Gísla Frey Valdórssyni um rannsókn á máli Tony Omos, samkvæmt svari ráðuneytisstjóra innanríkisráðuneytisins við fyrirspurn fréttastofu.

Lekamálið snérist í raun allt um meðferð upplýsinga um hælisleitandann Tony Omos, sem nú er á Ítalíu eftir að honum var vísað úr landi. Upplýst hefur verið að Sigríður Björk Guðjónsdóttir, núverandi lögreglustjóri á höfuðborgarsvæðinu, sendi Gísla Frey Valdórssyni, þáverandi aðstoðarmanni innanríkisráðherra, greinargerð um rannsókn lögreglustjórans á Suðurnesjum á málum Omos þegar Sigríður Björk var lögreglustjóri þar.

Persónuvernd hefur nú óskað eftir að embætti lögreglustjórans á Suðurnesjum skýri frá því hvaða upplýsingum var miðlað til innanríkisráðuneytisins með sendingu umræddrar greinargerðar. Þá er þess óskað að fram komi hvernig sú miðlun er talin horfa við ákvæðum laga um persónuvernd.

Jafnframt er þess óskað að afrit af umræddri greinargerð verði sent Persónuvernd og er lögreglustjóraembættinu gefin frestur til 3. desember til að svara.

Stefán Karl Kristjánsson, lögmaður Tony Omos. Vísir/Vilhelm

Munt þú koma þínum athugasemdum á framfæri við Persónuvernd?

„Það er alveg ljóst að ég mun senda Persónuvernd bréf fyrir hönd Tony og kalla eftir því að vera upplýstur um það sem þar gerist,“ segir Stefán Karl Kristjánsson, lögmaður Tony Omos. Hann segist jafnframt vonast til að Omos geti aftur sameinast barni sínu og barnsmóður á Íslandi.

Stefán Karl ætlast til að því verði svarað hvernig það samrýmist reglum að umræddar upplýsingar voru sendar frá lögreglustjóranum til aðstoðarmannsins.

En í svari við fyrirspurn fréttastofunnar til Ragnhildar Hjaltadóttur, ráðuneytisstjóra í innanríkisráðuneytinu, um rétt aðstoðarmanns og ráðuneytisins til að afla upplýsinga sem þessara, segir m.a.:

„Samkvæmt framangreindu hafa aðstoðarmenn ráðherra ekki heimild til að óska eftir gögnum um einstök mál sem heyra undir ráðherra sem stjórnvaldshafa, heldur einungis gögnum sem varða pólitísk störf ráðherra eða stefnumótun. Það á jafnt við um upplýsingar frá lögreglu sem aðrar.”

Þá kemur fram í svari við ósk fréttastofunnar til ráðuneytisins um að fá afhent afrit af greinargerðinni sem lögreglustjórinn sendi til aðstoðarmannsins, að greinargerðin sé ekki til í málaskrá ráðuneytisins.

Sem þýðir m.ö.o. að lögreglustjórinn á Suðurnesjum sendi pólitískum aðstoðarmanni innanríkisráðherra skjal sem hann mátti ekki biðja um og aðstoðarmaðurinn skráði ekki skjalið í gagnasafn ráðuneytisins.


Tengdar fréttir

Biður enga afsökunar á lekamálinu

Hanna Birna Kristjánsdóttir, fyrrverandi innanríkisráðherra, biður enga hlutaðeigandi afsökunar á lekamálinu í yfirlýsingu sinni sem hún sendi til fjölmiðla í dag vegna afsagnar sinnar sem innanríkisráðherra.

Hanna Birna hættir

Hanna Birna Kristjánsdóttir sagði af sér sem innanríkisráðherra í dag.

Gísli ræddi við Sigríði daginn sem gögnin voru birt

Aðstoðarmaður innanríkisráðherra átti í talsverðum samskiptum við Sigríði Björk Guðjónsdóttur, þáverandi lögreglustjóra á Suðurnesjum, daginn sem fréttir birtust byggðar á leka úr ráðuneytinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.