Áreitti fjórtán ára stúlku kynferðislega í strætisvagni

Karlmaður á fertugsaldri var í Hæstarétti í dag dæmdur í átta mánaða skilorðsbundið fangelsi fyrir kynferðislega áreitni í garð fjórtán ára stúlku í strætisvagni í Reykjavík. Hæstiréttur staðfesti dóm Héraðsdóms Reykjavíkur frá því í október í fyrra.

Þrjú ár eru síðan maðurinn áreitti stúlkuna kynferðislega um borð í strætisvagni á leið frá Kringlunni. Sakaði stúlkan manninn um að hafa klipið í læri sín, sagt henni að hann væri með stóran getnaðarlim og látið sig falla ofan á stúllkuna. Maðurinn viðurkenndi við skýrslutök að hafa klipið í rass stúlkunnar á leið þeirra inn í vagninn. Við aðalmeðferð neitaði hann þó að hafa haft nokkur afskipti af stúlkunni.

Kona sem var farþegi í vagninum bar fyrir dómi að maðurinn hefði káfað á brjóstum og lærum stúlkunnar. Þá hefði hann látið sig falla yfir þær. Hún hafi sagt henni að þær ættu að flytja sig aftar í vagninn. Þar lét hún stúlkuna setjast við gluggann en maðurinn settist fyrir aftan. Reyndi hann að tala við stúlkuna en konan hafi sagt honum að hætta því. Þær væru að tala saman. Taldi konan sig finna áfengislykt af manninum.

Þegar stúlkan var komin á áfangastað hljóp hún sem leið lá grátandi heim til sín en konan hindraði að maðurinn gæti veitt henni eftirför. Stúlkan sagði móður sinni að hún hefði séð umræddan mann áður áreita ungar stúlkur og vissi nafn hans. Flettu þær manninum upp á Facebook og tilkynntu lögreglunni um hvern ræddi.

Verjandi mannsins lagði fram vottorð frá geðlækni þess efnis að maðurinn hefði lent í alvarlegu bílslysi sem drengur. Hann hafi hlotið heilaskaða og samfara því sé dómgreindarbrestur, nokkur greindarskerðing, persónuleikabreyting auk þess sem hann hafi fengið geðroseinkenni.

Dómurinn taldi sannað að maðurinn hefði áreitt stúlkuna líkt og hann var sakaður um. Hins vegar væri ósannað að hann hefði sagst vera með stórt typpi og klipið hana í rassinn á leiðinni út úr vagninum.

Maðurinn hefur áður komið við sögu lögreglu og í maí 2012 var hann dæmdur í sex mánaða skilorðsbundið fangelsi fyrir auðgunarbrot. Nú beri að taka skilorðsdóminn upp. Var maðurinn því dæmdur í átta mánaða skilorðsbundið fangelsi til tveggja ára. Þá voru stúlkunni dæmdar 200 þúsund krónur í skaðabætur en hún hafði farið fram á 400 þúsund krónur.

Dómurinn í heild sinni.