Innlent

Dulbúnir menn virtu lokanir að vettugi

Sunna Karen Sigurþórsdóttir skrifar
Á fyrri myndinni sést þegar þyrla LHG sóttu mennina á hálendið. Seinni myndin sýnir þá í "dulargervi“.
Á fyrri myndinni sést þegar þyrla LHG sóttu mennina á hálendið. Seinni myndin sýnir þá í "dulargervi“.
Þrír menn sem kærðir hafa verið fyrir að fara inn á gosstöðvarnar við Holuhraun í leyfisleysi eiga að öllum líkindum yfir höfði sér himinháa sekt sem hleypur á hundruðum þúsunda. Þeir láta hins vegar fátt stöðva sig og fóru þangað, öðru sinni, í leyfisleysi á dögunum. Í þetta sinn þó í dulargervi og komust þangað inn óáreittir. Létu þeir útbúa sérstaka merkimiða á bíl þeirra með yfirskriftinni „Íslenskar jarðrannsóknir“, settu á sig hjálm og fóru í vesti.

Mennirnir vildu lítið tjá sig um málið þegar eftir því var óskað en hafa þeir fjallað töluvert um það á síðunni Ferðafrelsi á Facebook. Á þeirri síðu fara meðal annars fram margvíslegar umræður um ferðamenn og ferðamennsku á Íslandi.  Þar gagnrýna þeir harðlega að lokanir við eldsumbrotasvæðið norðan Vatnajökuls eigi einungis við um einstaka aðila.

Í samtali við fréttastofu segir Jóhannes Jensson, einn mannanna, þá alla vera þaulvana ferðamenn, útbúna öllum þeim tækjum og tólum sem nauðsynleg eru í ferðir sem þessar. Því sé það óskiljanlegt að þegar svæðinu sé lokað að það skuli ekki eiga við alla sem þangað vilja fara.

„Fáránleikinn algjör“

„Það virðist hinsvegar vera í góðu lagi að flestir aðrir séu á þessu lokaða hættusvæði, "fréttamenn", "ljósmyndarar", erlendir nemar, bílstjórar, aðstoðarmenn, ásamt vel tengdum vinum og vandamönnum. Þessir aðilar virðast mega valsa óhindrað um hættusvæðið, aka utanvega, taka montmyndir af sjálfum sér, flytja æsifréttir og gefa hinum puttann. Þeir eru oft á vanbúnum bílum og eru dæmi þess að þeir hafi þurft að skilja þá eftir fasta eða bensínlausa á leiðinni uppeftir,“ skrifar Jóhannes á Facebook.

„Fáránleikinn er bara algjör,“ segir hann í samtali við Vísi.

Mikill urgur meðal ferðamanna

Þá deilir Gunnar Árnason, einn mannanna, jafnframt þeirri upplifun sem fylgdi því að hafa verið sóttur inn á hálendi Íslands af sérsveitarmönnum.

„Það er ákveðin upplifun í því að vera sóttur af sérsveitarmönnum í skotheldum vestum á þyrlu Landhelgisgæslunnar (AppelSynunni) inn á hálendi Íslands og meðhöndlaður eins og stórglæpamaður fyrir það eitt að njóta náttúrunnar,“ skrifar Gunnar.

Pirrings gætir jafnframt hjá ferðaþjónustufyrirtækjum  og dæmi eru um að fyrirtæki hafi boðið upp á ferðir að gosstöðvunum, þrátt fyrir lokanir. Jóhannes segir mikinn urg á meðal íslenskra ferðamanna, upplifunin sem fylgi því að fara að gosstöðvunum sé stórfengleg.

Vísindamenn, lögregla og fjölmiðlar eru þeir einu sem hafa fengið takmarkað leyfi almannavarna til þess að vera inni á hættusvæðinu, þau skipti sem því hefur verið lokað og allt er það háð sérstökum skilmálum frá almannavörnum.

Í tilkynningu frá almannavörnum frá 12. september síðastliðnum segir svæðið við eldsumbrotasvæðið sé mjög óstöðugt og að hætta á flóðum vegna eldgosa undir jökli sé yfirvofandi. Því hafi verið ákveðið að loka svæðinu norðan jökulsins.  Eiturgufur séu áhyggjuefni og bráð lífshætta stafi af gasinu. Því sé ekki óhætt að nálgast svæðið án gasmæla og gasgríma.


Tengdar fréttir

Nýjar gossprungur myndast

Gosið færist nú nær jökli, nýjar gossprungur eru að myndast miðja vegu milli gömlu sprungunnar og jökuls.

Þrír kærðir og fleiri til rannsóknar

Þrír hafa verið kærðir fyrir að fara inn á gosstöðvarnar við Holuhraun í leyfisleysi. Þá eru fleiri aðilar til rannsóknar samkvæmt upplýsingum frá lögreglunni á Húsavík.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.