Hætt við faglega úttekt á DV

Stjórn útgáfufélags DV hefur fallið frá þeirri ákvörðun að láta skoða sérstaklega faglega þætti ritstjórnar blaðsins. Þetta kemur fram í tilkynningu frá útgáfufélaginu.

Blaðamenn DV voru ósáttir við þessa ákvörðun og töldu að með henni væri stjórn félagsins að gagnrýna störf blaðamanna. Hallgrímur Thorsteinsson, nýráðinn ritstjóri, fundaði með starfsmönnum í tæpar fjórar klukkustundir í dag.

Samkvæmt tilkynningunni var þess krafist á fundi ritstjórnar í morgun að stjórnin segði Reyni Traustasyni þegar upp störfum. „Sú ákvörðun er eðlilega í höndum stjórnar en ekki ritstjórnar,“ segir Þorsteinn Guðnason, stjórnarmaður DV, í tilkynningunni.

Þriðjudagsútgáfu DV hefur verið frestað um einn dag vegna málsins, en ákveðið hefur verið að DV komi næst út á miðvikudag og þaðan í frá samkvæmt útgáfuáætlun. Þá verða kynntir nýir efnisþættir í DV og á vefsíðu DV á næstu dögum auk þess sem búast má við því að fjölgað verði á ritstjórn miðlanna.