Þrír möguleikar í stöðunni

Rúmlega 700 skjálftar hafa mælst á svæðinu frá miðnætti.  Samkvæmt upplýsingum frá Veðurstofunni þokast virknin áfram til norðurs og er að mestu á 10 kílómetra löngu bili, með miðju undir jökuljaðrinum.

Vísindamannaráð fundaði í höfuðstöðvum Veðurstofu Íslands fyrr í dag og að fundi loknum var niðurstaða sérfræðinga að líklega væru þrír möguleikar í stöðunni. 

„Það getur auðvitað vel verið að jarðhræringarnar hreinlega hætti og að ekkert verði að eldgosi," segir Benedikt Ófeigsson jarðeðlisfræðingur hjá Veðurstofu Íslands.



Verði gos eru möguleikarnir taldir tveir, að sögn Benedikts. Annarsvegar að gosið komi upp fyrir utan jökulinn. Gangurinn nái þá til yfirborðs og eldgos hefjist. Líklegast er talið að það verði við norðurenda gangsins. Þá er líklegast að verði hraungos með nokkurri sprengivirkni.  



Hinn möguleikinn er að gangurinn nái til yfirborðs og eldgos hefjist en verulegur hluti eða öll sprungan verði undir Dyngjujökli. Gosið myndi leiða til jökulhlaups í Jökulsá á Fjöllum og ef til vill einnig sprengigoss með öskufalli.

Benedikt segir fjórða möguleikann vissulega vera til staðar, þó hann sé talinn ólíklegastur miðað við stöðuna húna, en hann er að gos hefjist í Bárðarbunguöskjunni.