Mint Solutions stefna að fjölgun starfsmanna á Íslandi

Íslenska fyrirtækið Mint Solutions hefur lokið fjármögnun upp 680 milljónir króna og voru það hollenskir og franskir fjárfestingasjóðir sem bættust í hóp hluthafa. Samkvæmt tilkynningu frá fyrirtækinu er aðkoma þeirra liður í hlutafjáraukningu Mint Solutions. Henni lauk 27. júní síðastliðinn upp á 4,4 milljónir evra, eða 680 milljónir króna.

Nýsköpunarsjóður atvinnulífsins tók einnig þátt í hlutafjáraukningunni, auk annara íslenskra fjárfesta sem hafa komið að félaginu frá 2011.

„Fjárfestingin gerir fyrirtækinu kleift að vaxa og takast á við þau verkefni sem eru framundan. Við þurftum að stækka þróunarteymið og getum það nú þegar hlutafjáraukningin er að baki,“ segir María Rúnarsdóttir, einn stofnenda Mint Solutions í tilkynningunni.

Hún segir mikinn feng í aðkomu erlendu hluthafanna Life Science Partner og Seventure.

Starfsmenn fyrirtækisins eru um tíu en nýbúið er að ráða tvo starfsmenn og er stefnt á að ráða tvo til fimm til viðbótar á Íslandi. Einn starfsmaður er í Hollandi og annar í Bandaríkjunum.

Nýsköpunarfyrirtækið Mint Solutions var stofnað árið 2010 og hefur unnið að þróun MedEye lyfjagreiningatækis fyrir sjúkrahús og heilbrigðisstofnanir. MedEye gerir hjúkrunarfræðingum kleift að ganga úr skugga um að sjúklingar fái rétt lyf, í réttu magni og á réttum tíma.

MedEye-tækið skannar lyf myndrænt og greinir lyfjategundir til að koma í veg fyrir mistök við lyfjaskömmtun. Greiningatækið er notað á ADRZ-sjúkrahúsinu í Vlissingen í Hollandi. Til stendur að taka tækin í notkun á tugum heilbrigðisstofnana í Hollandi og víðar.

Í kjölfar hlutafjáraukningarinnar mun móðurfélag Mint Solutions flytjast til Amsterdam í Hollandi. Sölustarfi fyrirtækisins verður stýrt þaðan. Þróunarstarf mun eftir sem áður verða á Íslandi.

„Aðkoma LSP og Seventure er í takt við það sem við hjá Nýsköpunarsjóði atvinnulífsins höfum verið að leita eftir,“ segir Helga Valfells, framkvæmdastjóri Nýsköpunarsjóðs atvinnulífsins. „Við fjárfestum snemma í nýsköpunar- og sprotafyrirtækjum sem vænta má mikils virðisauka og arðsemi af og síðan taka aðrir fjárfestar við sem gera fyrirtækinu kleift að taka næsta skref til vaxtar.“