Hugurinn ber þig hálfa leið, en skatturinn fylgir þér alla

Síðastliðin ár hefur töluverður fjöldi Íslendinga lagt land undir fót og sótt vinnu erlendis. Áður en haldið er af stað í slíkt ferðalag skiptir miklu að kortleggja áhrif skattareglna hérlendis og í hinu ríkinu til að forðast t.d. tvískattlagningu og álag á vantalda skattstofna hérlendis síðar meir. Það vill iðulega gleymast, sem er bagalegt enda getur umfang slíkra vandkvæða dregið verulega úr ábata einstaklingsins af starfinu erlendis.

Skattskylda getur verið í tveimur ríkjum

Þegar einstaklingar ætla að vinna erlendis en engu að síður viðhalda heimilisfesti sínu hérlendis þá ber þeim skylda til að greiða tekjuskatt hér á landi af öllum tekjum sínum, hvar sem þeirra er aflað, og eignum óháð staðsetningu þeirra. Það á einnig við um þá sem flytja heimilisfesti sitt, nema þeir sanni að þeir séu skattskyldir í öðru ríki á sama hátt og menn heimilisfastir þar og hafi fullnægt þeim skattskyldum sínum.

Þrátt fyrir þetta geta Íslendingar starfandi erlendis líka talist skattskyldir í því ríki vegna tekna eða eigna sem eiga uppruna sinn þar. Það ríki getur þannig haft takmarkað skattlagningarvald yfir íslenskum ríkisborgunum. Eins getur Ísland haft slíkt vald ef einstaklingarnir hafa flutt til útlanda en vinna að hluta hér á landi. Ef tvísköttunarsamningi er ekki til að dreifa milli Íslands og viðkomandi ríkis þá geta einstaklingar því lent í því að tekjurnar verði tvískattlagðar nema sótt sé sérstaklega um frádrátt vegna slíkra tekna í tengslum við skil skattframtals.

Atriði sem verður að hafa í huga

Fyrsta skrefið er því að kanna hvort tvísköttunarsamningur sé til staðar. Því næst þarf að meta hvar einstaklingurinn telst skattskyldur. Þá þarf að skoða undir hvaða almannatryggingakerfi einstaklingurinn fellur og hvort öll réttindi viðhaldi sér. Að auki þarf að meta áhrif erlendu teknanna á skattlagningu annarra tekna hérlendis og útreikning t.d. barnabóta, enda eru tekjur sem aflað er erlendis framtalsskyldar hér þótt þær séu undanþegnar/frádráttarbærar við skattlagningu á grundvelli tvísköttunarsamnings.

Það er því þannig að þótt hugurinn beri þig hálfa leið þá verður að huga að skattamálum áður en á hólminn er komið.