Var búið að dreyma um djúsí varir mjög lengi og fékk þann draum uppfylltan

Meðfylgjandi má sjá mynd sem tekin var af Örnu Báru Karlsdóttur fá sér gel í varirnar fyrir sjónvarpsþátt Ásdísar Ránar sem hefst á Stöð 3 í byrjun maí. Við spurðum Ásdísi um þáttagerðina og varaaðgerðina sem Arna Bára fór í.

„Tökurnar hjá mér eru á fullu núna og ég er einmitt á leiðinni til London í tvær spennandi myndatökur fyrir GQ og Top Gear magasín þar sem mér verður fylgt eftir í öllu prógramminu. Það verður skemmtilegt að fá að sýna frá svona glæsilegum tökum,“ segir Ásdís.

Fékk sér gel í varirnar í fyrsta skipti 

„Í „Beauty-horninu“ í þættinum fáum við svo að skyggnast bak við tjöldin í heimi fegurðarinnar og einmitt Í síðustu viku vorum við svo heppin að fá að fylgja Örnu Báru eftir þegar hún lét setja gel í varirnar á sér í fyrsta skipti hjá Ágústi Birgissyni lýtalækni. Arna er í óða önn að gera sig til fyrir keppnina „The Bikini Model Search“ sem er á vegum Playboy en keppnin fer fram í Cancun í Mexíkó  í lok mánaðarins. Sigurvegarinn í þeirri keppni fær að vera „Playmate“ eða leikfélagi og fær 50.000 dollara ásamt öðrum glæsilegum vinningum í verðlaun,“ segir Ásdís.

„Örnu var búið að dreyma um djúsí varir mjög lengi og fékk þann draum uppfylltan. Ég kem til með að sýna allt í þáttunum „Heimur Ísdrottningarinnar“  sem hefst á Stöð 3 í byrjun maí,“ segir hún áður en kvatt er.