GreenQloud opnar í gagnaveri í Bandaríkjunum

Fyrirtækið GreenQloud stefnir á opnun nýrrar hýsingar í gagnaveri Digital Fortress við Seattle borg í Washingtonfylki í Bandaríkjunum á næstunni. Fyrirtækið hýsir gögn fyrirtækja og leggur mikið upp úr því að vera vistvænt og að keyra á vistvænni og endurnýjanlegri orku.

„Við stefnum á að opna í gagnaverinu í maí. Um 95 til 97 prósent orkunnar sem mun keyra verið er endurnýjanleg orka, sem þykir mjög hátt hlutfall í Bandaríkjunum,“ segir Auður Alfa Ólafsdóttir, markaðsfulltrúi GreenQloud.

Hún segir að á svæðinu við Seattle séu mörg stór fyrirtæki með sterka umhverfisstefnu.

„Í dag erum við með kúnna frá yfir 80 löndum og erum að fara að keyra á bandaríska markaðinn í meira mæli. Eftir opnunina í Bandaríkjunum munum við geta þjónustað kúnna okkar þar miklu betur. Til dæmis eru mörg fyrirtæki þar í landi sem gera kröfu um að gögnin séu geymd í gagnaverum innan Bandaríkjanna.“

Í gær birtist grein á vef Guardian, þar sem farið er yfir það að stór tæknifyrirtæki séu í meiri mæli að notast við endurnýjanlega orku við rekstur gagnavera sinna. Í nýrri skýrslu frá Greenpeace, sem heitir Clicking Clean, og fjallar um hvernig tæknifyrirtæki skapi hið Græna internet, er GreenQloud nefnt. Segir að tilkoma fyrirtækisins og Green Mountain í Noregi gefi vísbendingu um hækkandi eftirspurn eftir grænni gagnahýsingu.

Í grein Guardian segir að gagnahýsing, sem einnig kallast skýjaþjónusta verði sífellt vinsælli hjá fyrirtækjum. Aðal ástæður þess eru að fyrirtæki þurfi þá ekki að kaupa og reka eigin vefþjóna með miklum tilheyrandi kostnaði.

Þessi aukning er einnig sögð gefa í skyn að gagnaverum muni fjölga og eftirspurn eftir gagnahýsingu sem keyri á endurnýjanlegri orku muni hækka. Þá þróun leiðir Evrópa.

Auk GreenQloud eru nefnd fyrirtæki eins og Green Mountain og Fjord IT, sem bæði eru í Noregi. Þá segir einnig að lönd eins og Ísland og Noregur séu vinsælir þegar kemur að byggingu nýrra gagnavera. Mikið sé af endurnýjanlegri orku og loftslagið bjóði upp á náttúrulega leið til að kæla vefþjónana.