Vinna hafin á ný á Keflavíkurflugvelli

Vinnustöðvun er nú lokið á Keflavíkurflugvelli en verkfallsaðgerðir flugvallastarfsmanna á Keflavíkurflugvelli  hófust klukkan fjögur í nótt og lauk þeim klukkan níu.

Allir formann stéttarfélaganna voru á svæðinu sem og verkfallsverðir. Flugvélar streyma nú að utan á Keflavíkurvöll og lenda ein af annarri.

Sex vélar lentu á nokkra mínútna fresti rétt eftir klukkan níu í morgun. Nú bíða þrír stórir breskir skólahópar á vellinum í þeirri von um að komast aftur heim.

Brottför sjö véla Icelandair frá Bandaríkjunum og Kanada var frestað ytra um þrjár klukkustundir.

Tvær morgunvélar Easy Jet frá Evrópu voru einnig fyrir töfum til klukkan níu. Óvenju mikil örtröð var í Leifsstöð um níu leitið þegar innritun, vopnaleit og önnur þjónusta í stöðinni hófst á ný.

Næsti samningafundur í kjaradeilunni verður á fimmtudag, en viðlíka aðgerðir og núna, hafa verið boðaðar þann 23. og 25. þessa mánaðar og svo allsherjar verkfall þann þrítugasta, ef ekki semst fyrir þann tíma.