Segja grenitré á Íslandi orðin nógu stór til að verða jólatré

Fjölmennasti viðburður í boðun jólanna á Íslandi, tendrun ljósanna á Oslóartrénu á Austurvelli, kann að heyra sögunni til. Borgarstjóri Oslóar segist ætla að hætta að gefa Reykvíkingum jólatré.

Í 63 ár hefur þetta verið stærsti viðburður á aðventunni í Reykjavík, þúsundir manna mæta jafnan til að fylgjast með því þegar ljósin eru tendruð á Oslóartrénu á Austurvelli.

Því bregður mörgum í brún þegar boðað er á að gjöfin verði skorin niður. Reykjavík og Rotterdam hafa trúlega fengið síðasta jólatréð að gjöf, segir Aftenposten. Þannig sparast 180 þúsund norskar krónur eða 3,4 milljónir íslenskra.

Ekki er nefnd sú ástæða að jólatréð hafi verið brennt í búsáhaldabyltingunni árið 2009. Heldur sagt að það sé of dýrt, flókið og lítið umhverfisvænt að senda stærðar jólatré um langan veg.

Viðbrögðin hérlendis hafa ekki látið á sér standa. „Ætlum að heyra í frændum okkar og vinum í Noregi,“ sagði aðstoðarmaður Jóns Gnarr borgarstjóra. „Vinátta Norðmanna við Ísland er ekki einu sinni eins jólatrés virði,“ sagði Árni Páll Árnason, formaður Samfylkingarinnar, og sagði þetta bætast við það hvernig Norðmenn og Færeyingar fóru með Ísland í makríldeilunni.

Ráðamenn Oslóar benda reyndar á að Íslendingar hafi verið duglegir að planta trjám og eigi orðið sjálfir nægilega stór grenitré, sem skorti árið 1951. Borgarstjóri Oslóar segist vilja ræða við starfsbróður sinn í Reykjavík um að finna aðra leið til að viðhalda þessari gleðilegu jólahefð. Það gæti því orðið síðasta áskorun Jóns Gnarr í embætti að bjarga jólunum í Reykjavík.