Varðstjóri á Litla-Hrauni dæmdur fyrir að áreita samstarfsmann

Varðstjóri á Litla-Hrauni var á föstudaginn dæmdur í eins mánaðar skilorðsbundið fangelsi í Héraðsdómi Suðurlands fyrir að hafa áreitt konu sem starfaði sem fangavörður í fangelsinu.

Varðstjórinn og fangavörðurinn, sem starfað hafa saman í þrettán ár, voru saman á vakt þann 11. janúar 2013. Varð varðstjórinn dæmdur fyrir að hafa strokið yfir vinstra brjóst varðarins utan klæða með hægri hendi.

Málið var kært til lögreglu í apríl 2013 en starfaði varðstjórinn áfram í fangelsinu þrátt fyrir ákæruna. Var honum svo veitt áminning vegna málsins.

Varðstjórinn bar fyrir sig að hafa verið að dást að nýrri flíspeysu sem fangavörðurinn og fleiri starfsmenn klæddust þann dag. Til umræðu hafi komið hversu mjúkar peysurnar væru og þá hafi hann, í hvatvísi, lagt höndina á öxl konunnar og strokið niður yfir brjóst brotaþola. Varðstjórinn hafi svo gengið út af varðstofunni en nokkru síðar spurst fyrir um fangavörðinn vegna verkefnis. Þá hafi honum verið tilkynnt að hún hafi farið veik heim. Ákærði hafi ekki tengt það framangreindum atburðum að því er segir í dómnum.

Brotaþoli kvað ákærða hafa gripið um brjóst sitt en vitnum að atburðinum bar ekki saman um hvað gerst hefði. Ákærði neitaði að hafa gripið um brjóst hennar. Hann neitaði jafnframt að verknaðurinn hefði verið unninn af ásetningi og uppfyllti því ekki sakæmisgildi almennra hegningarlaga. Á það féllst dómurinn ekki.

Dómurinn er skilorðsbundinn til tveggja ára. Þá þarf ákærði að greiða allan sakarkostnað og rúmlega 173 þúsund krónur í miskabætur.