Fyndnasti maður Norðurlandanna skemmtir með Mið-Íslandi

„Hann er eiginlega fyndnasti maður á Norðurlöndunum, ef ekki í heiminum,“ segir Halldór Halldórsson, einn meðlima Mið-Ísland um finnska uppistandarann André Wickström, en hann er staddur hér á landi að skemmta með uppistandshópnum Mið-Ísland.

„Hann langaði til þess að skemmta með okkur þannig að við hækkuðum bara miðaverðið á sýningarnar um helgina, bættum honum við og þá gekk allt upp,“ segir Halldór og bætir því við að Wickström og Ari Eldjárn, annar meðlimur Mið-Íslands séu hinir bestu mátar.

„Hann og Ari eru líka góðir vinir,“ segir Halldór. „Hann fer oft til Finnlands að heimsækja hann.“

Þetta er ekki í fyrsta sinn sem að Wickström treður upp hér á landi en hann kom fram hér á landi árið 2010 við mikinn fögnuð áhorfenda eins og sjá má á myndskeiðinu hér að neðan.