Horfðu á þetta og hættu að kvarta - MYNDBAND

Meðfylgjandi má sjá myndskeið af æfingum vikunnar sem Ísfirðingurinn Arna Sigríður Albertsdóttir, 23 ára, setti saman en hún varð fyrir alvarlegum mænuskaða í slysi þar sem hún fór af skíðabrautinni og hafnaði á tré þegar hún keppti með Skíðafélagi Ísafjarðar í Noregi árið 2006.   Arna hefur verið bundin við hjólastól síðan en hún heldur ótrauð áfram eins og sjá má í myndskeiðinu sem þú ættir að gefa þér tíma til að horfa á. Arna stefnir á Ólympíuleikana sem fram fara í Ríó 2016.

„Ég á erfitt með að svara því, ætli þetta sé ekki einhverskona útrás sem mig vantar og ég fæ með því að æfa, svo finnst mér þetta bara svo gaman, mig langar alltaf að ná lengra og gera betur,“ segir Arna spurð hvar hún fær þennan kraft þrátt fyrir að geta ekki gengið.



Stefnir á Ólympíuleikana

Hvert stefnir þú? „Stærsta markmiðið er að komast á Ólympíuleika og keppa á handahjóli. Svo er ég með mikið af minni markmiðum eins og til dæmis að bæta tímann minn í maraþoni og bæta bara formið almennt,“ segir Arna.

Erfiðast að byrja

Hvað viltu segja við fólk sem nennir ekki að hreyfa sig? „Kannski helst að það veit ekki af hverju það er að missa. Ef allir myndu finna hvað það gefur manni mikið að æfa reglulega, hvað það hefur mikil áhrif á allt lífið þá held ég að allir væru í góðu formi, alltaf.  Það er engin spurning fyrir mér að það er erfiðast að byrja, það er erfiðast að koma æfingum í rútínuna og finna hreyfingu sem hentar manni. Það er alls ekkert langt síðan ég hélt að ég ætti aldrei eftir að stunda hreyfingu eða íþróttir aftur. Ég bara sá það ekki gerast þegar ég missti hreyfigetuna í neðri hluta líkamans,“ segir þessi kraftmikla stúlka sem við ættum öll að taka okkur til fyrirmyndar. 



Bloggið hennar Örnu.