Mikill fjöldi á samstöðufundi á Austurvelli
Um 2.500 hafa boðað komu sína á samstöðufund á Austurvelli sem hófst fyrir skömmu. Gífurlegur fjöldi fólks er þar núna og er umferðarteppa á Sæbrautinni þar sem mikill fjöldi fólks er á leið í miðbæinn.
Þetta er fimmti dagurinn í röð þar sem boðað er til mótmæla og líklegast eru þetta fjölmennustu mótmælin til þessa, ef myndir frá Austurvelli eru skoðaðar.
Mótmælin eru vegna ætlunar ríkisstjórnarinnar að draga umsókn Íslands að Evrópusambandinu til baka án þjóðaratkvæðagreiðslu.
Í lokaræðunni á samstöðufundinum á Austurvelli, voru kosningaloforð Sigmundar Davíðs Gunnlaugssonar og Bjarna Benediktssonar spiluð í hátalarakerfi. Þetta vakti mikinn fögnuð viðstaddra.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
