Sigurður Ingi: „Misstum af sögulegu tækifæri“

Útséð er um að samningar náist í makríldeilunni eftir að fundi strandríkja lauk án samkomulags í Edinborg í gærkvöldi. Sjávarútvegsráðherra segir sögulegt tækifæri á sáttum hafa farið forgörðum vegna ósveigjanleika Norðmanna. Makrílkvóti íslenskra skipa fyrir þetta ár verður gefinn út á næstu vikum.

Reynt var til þrautar að ná samkomulagi í makríldeilunni á þeim grundvelli sem lá fyrir á milli Íslands og Evrópusambandsins. ESB hafði fallist á kröfur Íslands og Færeyja um að hvor þjóð fengi 12% makrílkvótans á komandi fiskveiðiári sem kom ekki til greina að mati Norðmanna.

„Við misstum af sögulegu tækifæri til að ná samkomulagi. Ástæðan fyrir því að það náðist ekki samkomulag er kannski aðallega ósveigjanleiki Norðmanna og órökstudd krafa þeirra um veiðar langt umfram ráðgjöf Alþjóða hafrannsóknaráðsins,“ segir Sigurður Ingi Jóhannsson, sjávarútvegsráðherra.

Óljóst með makrílkvóta ársins

Alþjóða hafrannsóknaráðið gaf út í dag að heildarmakrílkvótinn verði um 890 þúsund tonn á þessu ári. Norðmenn vildu að kvótinn yrði talsvert meiri en því höfnuðu önnur ríki og ESB vegna hættu á offramboði og verðhruni á helstu mörkuðum. Íslensk stjórnvöld munu einhliða ákvarða sér makrílkvóta fyrir næsta fiskveiðitímabil. Ráðherra segir óljóst hvort kvótinn verði meiri eða minni á þessu ári.

„Við höfum verið að veiða u.þ.b. 130 þúsund tonn á síðustu tveimur árum og ef að við hefðum náð samkomulagi á grundvelli þeirrar ráðgjafar þá hefðum við veitt svipað á þessu ári. Við eigum eftir að fara betur yfir hvernig úthlutun heildaraflans til íslenskra skipa verður háttað,“ segir Sigurður Ingi.

„Þjóðir eiga enga vini - bara hagsmuni“

Makríldeila milli Íslendinga og Norðmanna hefur verið nokkuð hörð. Norðmenn hafa sýnt makrílveiðum Íslendinga lítinn skilning. „Það hefur komið skýrt fram að þeir telja okkar hluteild eigi að vera mun lægri heldur en við sækjumst eftir,“ segir Sigurður Ingi.

„Það hefur stundum verið sagt að þjóðir eigi enga vini - bara hagsmuni. Við höfum sannarlega tekist á en auðvitað eru þetta frændþjóðir og ég trúi því að við náum niðurstöðu.“