Rauður kjóll fyrir ríkisstjórnina

Fulltrúar frá GoRed samtökunum heimsóttu ríkisstjórnina í upphafi ríkisstjórnarfundar í morgun til að fræða ráðherra og afhenda þeim merki samtakanna sem er rauður kjóll.

Samtökin eru alþjóðleg og vinna með Hjartaheill, Hjartavernd, Heilaheill  og fagdeild hjúkrunarfræðinga.

Formaður samtakanna á Íslandi er Þórdís Jóna Hrafnkelsdóttir, hjartalæknir, og verndari er Ingibjörg Pálmadóttir, fyrrverandi alþingismaður og heilbrigðis- og tryggingamálaráðherra.

Í tilefni af væntanlegum konudegi, verður á laugardag vakin sérstök athygli á staðreyndum sem ekki eru öllum ljósar en vert er að gefa alvarlegan gaum.

Eftirfarandi kemur fram í tilkynningu frá samtökunum:

1. Að hjarta- og æðasjúkdómar eru algengasta dánarorsök kvenna á Íslandi eins og í flestum löndum í hinum vestrænum heimi.

2. Að gera konur meðvitaðar um fyrirbyggjandi þætti í þessum efnum.

3. Að hvetja konur og heilbrigðisstarfsmenn að vera vakandi fyrir einkennum hjarta- og æðasjúkdóma sem eru yfirleitt ekki þau sömu hjá körlum og konum. Konur eru oft greindar með sjúkdóminn seint og illa þar sem þetta er á stundum almennt talið „karlasjúkdómar".

Laugardaginn 22. febrúar verður samkoma í Kringlunni í Reykjavík þar sem allri þjóðinni er boðið til athafnarinnar sem hefst klukkan 14 og stendur til kl. 15:30.