Bókum og sögum gert hátt undir höfði í Stykkishólmi

Bókahátíðin Júlíana – hátíð sögu og bóka verður haldin  um næstkomandi helgi í Stykkishólmi og er þetta í annað sinn sem hátíðin er haldin. Á hátíðinni á að gera bókum og sögum hátt undir höfði og hvetja fólk til að lesa og semja sínar eigin sögur. Þema hátíðarinnar í ár eru glæpir og misgjörðir í sögnum og bókum. Forsvarsmenn hátíðarinnar segja hana líklega vera eina hátíð sinnar tegundar á landinu.

Dagskrá hátíðarinnar er helguð lífsstarfi Guðmundar Páls Ólafssonar, náttúrufræðings og rithöfundar, en hún hefst annað kvöld, þegar hátíðin verður sett í Vatnasafninu í Stykkishólmi. Þar verða úrslit smásagnasamkeppni sem efnt var til kynnt ásamt öðrum viðburðum.

Á föstudeginum verður dagsrká víða um bæinn og munu íbúar bæjarins bjóða fólki í heimsókn þar sem Hólmarar munu flytja efni að eigin vali. Kvöldinu lýkur með sögugerð á Hótel Egilsen og geta allir tekið þátt í henni.

Í tilkynningu um hátíðina segir að hópur fólks  í tengslum við hátíðina hafi lesið bók Ármanns Jakobssonar, Glæsi sem er söguleg skáldsaga sem byggir á atburðum úr Eyrbyggju.

Ármann mun svo hitta leshópinn á laugardaginn en hann mun einnig halda erindi í gömlu kirkjunni í Stykkishólmi. Þar mun rithöfundurinn Guðmundur Andri Thorsson fjalla um bók sína, Sæmd og Árni Þórarinsson mun ræða um tilurð sögupersóna sinna.

Leikþátturinn Víg Kjartans Ólafssonar eftir Júlíönnu Jónsdóttur, sem hátíðin er nefnd eftir, verður leiklesinn af leikkonunni Alexíu Björgu Jóhannsdóttir, sem á uppruna sinn að rekja til Stykkishólms.